O‘zbekistonda nogironligi bo‘lgan shaxslar ishlari bo‘yicha idoralararo kengash tuzildi

Vazirlar Mahkamasi 29-aprel kuni “Nogironligi bo‘lgan shaxslar ishlari bo‘yicha idoralararo kengash faoliyatini tashkil etish to‘g‘risida”gi qarorni tasdiqladi, deb xabar bermoqda Norma.

Kengashga bosh vazirning ijtimoiy rivojlantirish masalalari bo‘yicha o‘rinbosari Behzod Musayev rais bo‘ldi. Sog‘liqni saqlash vaziri Abduhakim Xojiboyev uning o‘rinbosari etib tayinlandi. Kengash tarkibiga, shuningdek, mahalla va oilani qo‘llab-quvvatlash vaziri Rahmat Mamatov, oliy va o‘rta maxsus ta’lim vaziri Abduqodir Toshqulov, O‘zbekiston nogironlar jamiyati raisi Komil Abdullayev, xalq ta’limi vaziri Sherzod Shermatov, maktabgacha ta’lim vaziri Agrippina Shin va boshqalar kiritildi.

Idoralararo kengashning asosiy vazifalari quyidagilardan iborat:

• nogironligi bo‘lgan shaxslarning huquqlarini ta’minlash sohasidagi davlat siyosatini amalga oshiruvchi davlat organlari faoliyatini muvofiqlashtirish;
• nogironligi bo‘lgan shaxslarning sog‘lig‘ini tiklash, ularni reabilitatsiya qilish, ijtimoiy himoya qilish va huquqlarini ta’minlashga doir davlat dasturini amalga oshirishda ishtirok etish;
• nogironligi bo‘lgan shaxslarning ta’lim olishi, ularni kasbga tayyorlash, qayta tayyorlash, malakasini oshirish, mehnat qilishi va bandligiga ko‘maklashish;
• nogironligi bo‘lgan shaxslarning jamiyat va davlat hayotida to‘la huquqli tarzda ishtirok etishi uchun qulay shart-sharoitlar yaratishda ishtirok etish.