Samarqand viloyatining Urgut tumanida 98 yoshli urush qatnashchisiga tug‘ilganlik haqida guvohnoma berildi. Bu haqda Davlat xizmatlari agentligi matbuot xizmati xabar berdi.
Agentlikning Samarqand viloyati boshqarmasi Urgut tumani Davlat xizmatlari markazi hamda 1-son FHDYo bo‘limi xodimlari “Ispanza” qishlog‘ida yashovchi, Ikkinchi jahon urushi qatnashchisi, 98 yoshli Bo‘ron bobo Gadoyevning xonadonida bo‘lib, otaxon va uning oila a’zolariga sayyor davlat xizmatlari ko‘rsatgan.
“Qariyb yuz yoshni qoralayotgan otaxonning shu paytga qadar tug‘ilganlik to‘g‘risidagi guvohnomasi yo‘qligi aniqlanib, rasmiylashtirilib berildi. Shuningdek, otaxon suhbat chog‘ida pensiya miqdori to‘g‘risida ma’lumotnoma kerakligini bildirdi. Markaz xodimlari qisqa fursatda ushbu murojaatni ro‘yxatga olib, tez fursatlarda ma’lumotnomani taqdim etishdi”, — deyiladi xabarda.
Otaxonning oila a’zolari xonadon kadastr hujjatlarida muammolar borligini aytib, bu masalada yordam so‘ragan. Shu kuni ushbu masalaga ijobiy yechim topish choralari ko‘rilgan.
Avvalroq Qashqadaryo viloyatining Dehqonobod tumanida 99 yoshli Ikkinchi jahon urushi qatnashchisiga Prezident nomidan maxsus sovg‘a va 12 million so‘m pul topshirilgani, Buxoroda 102 yoshli Ikkinchi jahon urushi qatnashchisining ta’mirtalab uyi qator murojaatlarga qaramay, e’tiborsiz qolib kelayotgani haqida xabar berilgan edi.
Izoh (0)