Мактабгача таълим вазирлиги боғчаларда болалар таъминоти учун ота-оналар тўлови миқдори оширилганини озиқ-овқат маҳсулотларини нархининг ошгани билан изоҳлади. Бу ҳақда 4 май куни АОКАда ўтказилган брифингда вазирлик матбуот хизмати маълум қилинди.
Эслатиб ўтамиз, 2021 йил 1 майдан давлат мактабгача таълим муассаса (МТМ)ларида болалар таъминоти учун ота-оналар тўловининг янги — ўртача 15 фоизга оширилган миқдорлари жорий этилди.
Мактабгача таълим вазирлиги матбуот хизматининг маълум қилишича, ота-оналар томонидан тўланган пул маблағларининг катта қисми болаларнинг овқатланишига, шунингдек, фойданинг 5 фоиздан ортиқ бўлмаган қисми боғчаларнинг моддий-техник базасини яхшилашга, биринчи навбатда, санитар-гигиеник воситаларни харид қилишга йўналтирилади.
Давлат статистика қўмитасининг маълумотларига кўра, 2020 йилда озиқ-овқат маҳсулотларининг нархи ўртача 15,3 фоизга ошган, хусусан, нон нархи 15,2 фоизга, товуқ, мол гўшти ва балиқ — 18,1 фоизга, сут маҳсулотлари — 11,5 фоизга, тухум — 37,6 фоизга, мевалар, сабзаволар ва картошка — 11,9 фоизга, ёғ ва мойлар — 27 фоизга, шакар, чой ва бошқа маҳсулотлар — 11,8 фоизга.
Бундан ташқари, вазирликнинг маълум қилишича, ота-оналар томонидан ҳар ойда тўланадиган тўловлар Тошкент шаҳри, вилоятлар марказлари, вилоят бўйсунувидаги шаҳарлар ва бошқа жойдаги давлат МТМлари учун табақалаштирилган ҳолда белгиланган. Болалар боғчаси учун энг юқори миқдорлар пойтахтда амал қилади — 246 минг сўм, энг паст кўрсаткич туманларда — 167 минг сўм.
Шунингдек, 2023 йилнинг 1 январига қадар Навоий вилояти Нурота тумани ҳамда Сурхондарё вилояти Қизириқ туманидаги давлат мактабгача таълим муассасаларида ота-оналар ҳар ойда болалар таъминоти учун ўрнатилган тарифнинг икки баравар кам миқдорида ҳақ тўлайди.
Бундан ташқари, ота-оналарнинг ҳар ойлик тўлови Қорақалпоғистон Республикаси ва Хоразм вилоятидаги барча мактабгача таълим ташкилотларида, шунингдек, бошқа вилоятлардаги айрим боғчаларда ҳам ўрнатилган тарифнинг 50 фоизи миқдорида тўланади.
Изоҳ (0)