O‘zbekiston milliy terma jamoasi may oyida Avstraliyaga qarshi nazorat uchrashuvida maydonga tushadi. Bu haqda terma jamoalar bo‘limi boshlig‘i Azizbek Haydarov O‘FA rasmiy YouTube kanaliga bergan intervyusida xabar berdi.
O‘zbekiston milliy terma jamoasi 20-may kuni Toshkent viloyatining Bo‘stonliq tumanidagi Chimyon tog‘ yonbag‘irlari yig‘in boshlaydi. Safar oldidan sanitariya-epidemiologiya qoidalariga qat’iy rioya qilgan holda mashg‘ulotlar yopiq tarzda o‘tkaziladi.
28-may sanasida terma jamoa delegatsiyasi BAAga jo‘nab ketadi va 29-may kuni Dubay shahrida Avstraliya terma jamoasi bilan nazorat o‘yinini o‘tkazadi.
Shunday so‘ng, Vadim Abramov shogirdlari Saudiya Arabistoniga yo‘l oladi va 7-iyun kuni o‘tadigan Singapur terma jamoasiga qarshi dastlabki uchrashuvga tayyorgarlik ko‘radi.
Eslatib o‘tamiz, iyun oyida JCh—2022 va Osiyo Kubogi—2023 qo‘shma saralashi doirasidagi o‘yinlar markazlashgan tizimda o‘tkaziladi. O‘zbekiston joy olgan guruh bahslari Saudiya Arabistonida bo‘lib o‘tadi.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)