Davlat aktivlarini boshqarish agentligi 2020-yil yakuni bo‘yicha moliyaviy hisobotlar tahlilida “Paxtakor” futbol klubini eng ko‘p zarar ko‘rgan 10 korxona tarkibiga kiritdi.
Unda 2020-yilda “Paxtakor” futbol klubining 82,7 mlrd so‘m miqdorida zarar ko‘rgani qayd etilgan. “Paxtakor” matbuot xizmati ushbu ma’lumotnoma yuzasidan rasmiy bayonot bilan chiqdi.
“Paxtakor futbol klubi” MChJ O‘zbekiston Respublikasi Prezidentining 2017-yil 21-avgustdagi 3227-sonli “‘Paxtakor’ futbol klubining moddiy-texnika bazasini yanada takomillashtirish chora-tadbirlari to‘g‘risida”gi qaroriga ko‘ra, investitsiya shartlarini bajargan holatda 80 foiz ulushi SFI Management Group MChJga o‘tishi va klubning ustav fondidagi 20 foiz ulushini Toshkent shahar hokimligida saqlab qolish to‘g‘risidagi taklif ma’qullangan. Shu vaqtdan buyon “Paxtakor” futbol klubi budjeti to‘lig‘icha SFI Management Group MChJ tomonidan shakllantirib kelingan. “Paxtakor” futbol klubi o‘tgan yillar mobaynida davlat budjetidan umuman mablag‘ olmaganligini ma’lum qilamiz.Taniqli futbol mutasaddisi Alisher Nikimbayevning xabar qilishicha, “Paxtakor” klubi 2018—2020-yillar to‘liq SFI Management Group tomonidan moliyalashtirilgan. 2021-yilning mart oyidan boshlab ushbu kompaniya “Paxtakor” aksionerlari ro‘yxatidan chiqqan.Davlat aktivlarini boshqarish agentligi tarqatish uchun tayyorlagan ma’lumotlarining to‘g‘ri va xolis ekani bo‘yicha majburiyatga egaligini unutmasligi lozim.
“Paxtakor” klubi
SFI Management Group kimga tegishli?
2018-yil avgustida kompaniya O‘zbekistondagi loyihalarga Alisher Usmonov homiyligida jalb qilingani haqida xabar berilgandi. Keyinchalik tadbirkor SFI’ning egasi Fattoh Shodiev ekanligini rad etgan, ammo uning akasi va do‘stining oilasiga tegishli ekanligini bildirgan.
Hozirda kompaniya saytida O‘zbekistondagi faqat ikkita loyiha — “Paxtakor” FK va “Toshkent metallurgiya zavodi” ko‘rsatilgan. Avvalroq ro‘yxatda Evroasia Insurance, “O‘rtachirchiqparranda” va “O‘zkimyofarm” ham bo‘lgan.
Ma’lumot uchun, SFI Management Group MChJ xorijiy korxonasi korxonalarni bozor munosabatlariga moslashtirish, xalqaro standartlarni joriy etish, xorijiy mutaxassislar va investitsiyalarni jalb qilishda faol ishtirok etish orqali O‘zbekistonning iqtisodiy rivojlanishiga hissa qo‘shish maqsadida tashkil etilgan.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)