Xorazmda o‘z joniga qasd qilgan 19 yoshli kelin ishi yuzasidan jinoiy ish qo‘zg‘atildi. Bu haqda “Daryo”ga Bosh prokuratura xabar qildi.
Ma’lumot uchun, Xorazm viloyatida 2002-yil 14-fevral kuni tug‘ilgan, Shovot tumani “Katqal’a” mahallasida yashagan fuqaro Q.M. 2021-yil 1-aprel kuni soat 10:00 larda o‘z uyidagi qoramollarni saqlash xonasining yog‘och to‘siniga oq rangli shpagat ip bilan o‘zini o‘zi osib, joniga qasd qilgan.
Sud-tibbiy ekspertizaning 2021-yil 13-apreldagi 11-sonli xulosaga ko‘ra M.Q.ning o‘limiga bo‘yin a’zolarining sirtmoq bilan siqilishi natijasida kelib chiqqan mexanik asfiksiya sabab bo‘lgan.
Shu bilan birga, ekspert tekshiruvida M.Q.ning o‘ng ko‘z pastki qovog‘ida qontalash borligi, ushbu jarohat og‘irlik darajasi bo‘yicha olti kundan ortiq bo‘lmagan, ozgina tez o‘tib ketuvchi jarohat hisoblanishi, xususiyatiga ko‘ra 2-3 kun oldin kelib chiqqan bo‘lishi mumkinligi, boshqa jarohat izlari aniqlanmagani, uning homilador bo‘lmagani aniqlangan.
Shuningdek, Urganch davlat universiteti psixologlari tomonidan 2021-yil 15-aprelda taqdim qilingan xulosada M.Q. o‘z joniga qasd qilishi vaqtida o‘z harakatlarini anglamagan va affekt holatida bo‘lgan bo‘lishi mumkinligi, pasport yoshi psixologik yoshiga nisbatan mos kelmasligi, qayd qilinganlar va oila qurishga tayyor bo‘lmagani sababchi bo‘lgan bo‘lishi mumkinligi ko‘rsatilgan.
O‘z navbatida tuman xalq ta’limi psixologlari tomonidan M.Q.ning o‘z joniga qasd qilishiga erta turmushga berilganligi, oila qurishga tayyor bo‘lmasdan depressiya holatida bo‘lgani sababchi ekanligi yuzasidan xulosa taqdim qilgan.
Bundan tashqari, M.Q.ning xonasidan qora qalam bilan daftar varag‘iga o‘zi tomonidan yozilgan xat topib olingan.
Mazkur xatda M.Q. turmush o‘rtog‘i M.Y. va ota-onasini yaxshi ko‘rishini, hammadan rozi ekanligini, turmush o‘rtog‘iga ota bo‘lish baxtini bera olmaganidan armondaligini bildirgan.
Respublika Ichki ishlar vazirligi Xorazm viloyat Ichki ishlar boshqarmasi ekspertiza-kriminalistika bo‘limi tomonidan 2021-yil 14-aprelda taqdim qilingan xulosaga ko‘ra qayd qilingan xat M.Q. tomonidan yozilgan.
Xuddi shuningdek, tekshiruvda M.Q.ning turmush o‘rtog‘i M.Y. yoki uning oila a’zolari bo‘yicha huquqni muhofaza qiluvchi organlarga yoki mahalla fuqarolar yig‘iniga ariza kelib tushmagani, bu bilan holatlar muhokama qilinmagani ma’lum bo‘ldi.
O‘z navbatida M.Q. viloyat ruhiy-asab kasalliklari shifoxonasi yoki viloyat narkologiya dispanserida ro‘yxatga olinmagan. Shu bilan birga, M.Q. kasalligi tufayli yoki tan jarohatlari bilan shifoxonaga murojaat qilmagan.
To‘plangan hujjatlarga ko‘ra, M.Q. telefon apparati ishlatmagan va internet tarmog‘idan foydalanmagan, nisbatan tanish-bilishlariga oilasidan shikoyat bildirmagan va shubhali xabarlar qoldirmagan, qo‘shnisidan besh ming so‘m qarz olganligi holatidan oila a’zolarining xabari bo‘lmagan, notinch oila sifatida ro‘yxatda turmaydi, turmush o‘rtog‘i yoki boshqa oila a’zolari jinoiy va ma’muriy javobgarlikka tortilmagan.
Tekshiruv yakuniga ko‘ra M.Q.ning o‘zini o‘zi osib, o‘z joniga qasd qilganligi holatida biron-bir shaxsning harakatlarida jinoyat tarkibi aniqlanmagani sababli tuman prokurori D.A. tomonidan 2021-yil 18-aprel kunida Jinoyat protsessual kodeksining 83-moddasi 2-bandiga (gumon qilinuvchi, ayblanuvchi, sudlanuvchining qilmishida jinoyat tarkibi bo‘lmaganda aybsiz deb topish va reabilitatsiya qilish) asosan jinoyat ishi qo‘zg‘atishni rad qilish va marhumaning turmush o‘rtog‘i M.Y.ga Ma’muriy javobgarlik to‘g‘risidagi kodeksning 52-moddasi 2-qismi (qasddan yengil tan jarohati yetkazish) bilan ma’muriy javobgarlik to‘g‘risida ish qo‘zg‘atish haqida qaror qabul qilingan.
Ushbu qaror viloyat prokuraturasi tomonidan 2021-yil 28-aprelda bekor qilinib, qo‘shimcha tergovga qadar tekshiruv harakatlari o‘tkazish uchun tuman prokuraturasiga qaytarib yuborilgan.
Qo‘shimcha tergovga qadar tekshiruv davomida Respublika sud-tibbiy ekspertizasi ilmiy-amaliy markazi Xorazm filialiga komissiyaviy sud-tibbiy ekspertiza tayinlagan va hozirda ekspertiza tekshiruvi davom etmoqda.
Eslatib o‘tamiz, 2020-yilning iyul oyida Qashqadaryoda 18 yoshli juvon uyidan osilgan holda topilgan, marhumaning onasi qizining o‘limida kuyovini ayblagan. O‘sha yilning oktabr oyida Samarqandda er 24 yoshli xotinini bo‘g‘ib o‘ldirib, arqonga osib qo‘ygani, noyabr oyida Buxoroda xotinini o‘z-o‘zini o‘ldirish darajasiga yetkazgan er 7 yil-u 6 oyga qamalgani haqida xabar berilgandi. Shuningdek, Toshkentda xotinini bolasining axlatini yeyishga majbur qilgan erkak va Xorazmda oilaviy janjal oqibatida xotinini bo‘g‘ib o‘ldirib qo‘ygan erkak qo‘lga olingani to‘g‘risida xabar qilingandi.
Izoh (0)