Prezident Shavkat Mirziyoyev tashabbusi bilan davlat xizmatida korrupsiyaga qarshi kurashish tizimini yanada takomillashtirish maqsadida qonunchilikka qator yangi mexanizm va normalarni kiritish taklif etilmoqda. Bu haqda Korrupsiyaga qarshi kurashish agentligi axborot xizmati xabar berdi.

Foto: Pixabay

Qayd etilishicha, “Davlat fuqarolik xizmati to‘g‘risida”gi qonun loyihasini ishlab chiqish ishlarini yakunlanadi va u qisqa muddatda parlamentga kiritiladi. Mazkur qonun bilan “sovg‘a” tushunchasiga aniqlik kiritilib, davlat xizmatchilari tomonidan sovg‘a olish va berish tartibini belgilovchi “Sovg‘a siyosati” deb nomlangan alohida bob bilan to‘ldiriladi.

Bundan tashqari, davlat organlarida korrupsiya holatlari va manfaatlar to‘qnashuvining oldini olish maqsadida qonun bilan tartibga solinadigan Davlat xizmatchilarining odob-axloq kodeksi ishlab chiqiladi va unda davlat xizmatchilari uchun cheklovlarning aniq ro‘yxati belgilanadi.

“Korrupsiyaga qarshi kurashish to‘g‘risida”gi qonun korrupsiyaga oid huquqbuzarliklar to‘g‘risida xabar bergan fuqaroning himoyasi kafolatlanib, uning shaxsi sir saqlanishi to‘g‘risidagi norma bilan to‘ldiriladi.

Eslatib o‘tamiz, Shavkat Mirziyoyev 2020-yil 24-yanvarda Oliy Majlisga yo‘llagan murojaatnomada korrupsiyaning oqibatlari bilan kurashishdan ko‘ra barvaqt oldini olishga o‘tish kerakligini ta’kidlab, unga qarshi kurashishga mas’ul bo‘ladigan alohida organ tuzishni taklif qilgan edi. 2020-yilning 11-fevralida mazkur organni tashkil etish masalalari bo‘yicha Prezident raisligida yig‘ilish bo‘lib o‘tgandi. Iyun oxiriga kelib mamlakatda Korrupsiyaga qarshi kurashish agentligi tashkil etildi va unga “Yuksalish” umummilliy harakati raisi, Oliy Majlis Qonunchilik palatasi deputati Akmal Burhonov direktor etib tayinlandi.

Oktabr oyi boshlarida Akmal Burhonov amaldorlar 2021-yildan daromad va mulklari haqida majburiy deklaratsiya to‘ldirishi haqida ma’lum qilgandi. Shuningdek, fuqarolarning korrupsion holatlar yuzasidan murojaatlarini tartibga solish uchun maxsus platforma ishga tushirilishini bildirgan.