Respublikada amalga oshirilayotgan mahalliylashtirish dasturining ijrosi milliy iqtisodiyotimiz uchun davr talab etayotgan yangi munosabatlarning eng muhim omillaridan biridir. Shu sababli bugungi kunda sanoat korxonalarida ham mahalliylashtirilgan mahsulotlarni keng ko‘lamda ishlab chiqarishga e’tibor qaratilmoqda.
Mamlakatimizning eng yirik sanoat korxonalaridan biri hisoblangan Olmaliq kon-metallurgiya kombinatida mahalliylashtirish dasturi doirasida keng ko‘lamli ishlar amalga oshirilib, dastur ijrosi natijasida raqobatbardosh, import o‘rnini bosadigan mahsulotlar ishlab chiqarilishiga va katta miqdordagi valyuta mablag‘larining tejalishiga erishilmoqda.
Kombinatda mahsulot ishlab chiqarishni mahalliylashtirish asosan ikki yo‘nalishda amalga oshirib kelinyapti. Bular kombinatning mavjud va yangi quvvatlarida mahsulot ishlab chiqarishni mahalliylashtirish hamda yurtimizda faoliyat yuritib kelayotgan ishlab chiqaruvchi korxonalar bilan kooperatsiya aloqalarini kengaytirish hisobiga mahsulot ishlab chiqarishni mahalliylashtirish hisoblanadi.
2021-yilning 1-choragi yakunlariga ko‘ra, kombinatda mahalliylashtirish dasturi doirasida, 56 ta loyihalar asosida 43 milliard so‘mlik mahsulotlar ishlab chiqarishga erishilib, reja 134 foizga bajarildi. Bundan tashqari, 200 ming dollardan oshiq mahalliylashtirilgan mahsulotlar eksporti amalga oshirildi.
Quvonarlisi, ishlab chiqarilayotgan mahsulotlar kombinatning ichki ehtiyoji hamda mamlakatimizda faoliyat yuritib kelayotgan tog‘-kon sanoati korxonalari uchun mo‘ljallangan ekanligi bilan ahamiyatlidir.
O‘zbekiston Respublikasi Iqtisodiy taraqqiyot va kambag‘allikni qisqartirish vazirligi huzuridagi elektron kooperatsiya portali orqali 2021-yilning 1-choragida 70 milliard so‘mdan oshiq, 900 dan ziyod shartnomalar imzolanib, reja ko‘rsatkichlari 112,5 foizga bajarildi.
Joriy yilning 22—24-aprel kunlari Navoiy kon-metallurgiya kombinatida metallurgiya, mashinasozlik, energetika, kimyo sanoati va qurilish materiallari sohasidagi respublika tarmoqlararo kooperatsiya sanoati yo‘nalishida kooperatsiya yarmarkasi tashkil etildi. Mazkur yarmarkada OKMK ham ishtirok etib, O‘zbekiston Respublikasi Iqtisodiy taraqqiyot va kambag‘allikni qisqartirish vazirligi huzuridagi elektron kooperatsiya portali orqali 40 milliard so‘mdan ziyod shartnomalar tuzishga erishdi.
Hozirgi kunda respublikaning bir nechta korxonalari, shu jumladan, kichik va o‘rta biznes tadbirkorlik subyektlari bilan kombinat ehtiyojlari uchun foydalaniladigan, yangi turdagi import o‘rnini bosuvchi mahsulotlarni ishlab chiqarishni yo‘lga qo‘yish bo‘yicha takliflar berilgan va bu borada ishlar olib borilmoqda.
Kombinatda mahalliylashtirish dasturi ijrosi asosan markaziy ta’mirlash mexanika zavodi, rux zavodi, nodir metallar va qattiq qotishmalar ishlab chiqarish bo‘yicha ilmiy ishlab chiqarish birlashmasi kabi mehnat jamoalari tomonidan amalga oshirilib kelinmoqda.
Dasturning bosh ijrochisi bo‘lgan markaziy ta’mirlash mexanika zavodida ham yildan yilga import mahsulotlari o‘rnini qisqartirish, raqobatbardosh mahsulotlar ishlab chiqarish borasida salmoqli ishlar amalga oshirilmoqda.
Ayni paytda zavodda po‘lat va cho‘yandan ehtiyot qismlar quyish, nostandart uskunalar, konveyer uskunalari, grat va grat nasoslari, maydalash uskunalari, tegirmon uskunalari va ekskavatorlarga ehtiyot qismlar tayyorlanayapti.
2021-yilda MTMZda mahalliylashtirish dasturi doirasida 82,2 milliard so‘mlik loyihalar amalga oshirish rejalashtirilgan bo‘lib, 1-chorakning o‘zida 24,2 milliard so‘mlik mahsulotlar ishlab chiqarildi va 3 oylik reja 126,6 foizga bajarilishiga erishildi.
Yaqin istiqbolda mahalliylashtirish jarayonlarini chuqurlashtirish maqsadida, zavodni modernizatsiya qilish va buning natijasida texnologik uskunalar uchun hozirda import orqali sotib olinayotgan ehtiyot qismlar hamda butlovchi buyumlarni ushbu bo‘linma quvvatlarida ishlab chiqarishni yo‘lga qo‘yish rejalashtirilgan.
Shuningdek, nodir metallar va qattiq qotishmalar ishlab chiqarish bo‘yicha ilmiy ishlab chiqarish birlashmasi tomonidan ham 2021-yilning 1-choragida dastur ijrosi bo‘yicha quvonarli natijalar qayd etildi. Yanvar-mart holatiga ko‘ra, 11,1 milliard so‘mlik 27 xil mahsulot ishlab chiqarilgan bo‘lib, reja 104,1 foizga uddalangan.
Birlashma mehnat jamoasi tomonidan asosan import mahsulotlari bo‘lgan VK30 qattiq qotishmali halqa, qattiq qotishmali roliklar, T14K8 qattiq qotishmali kesgichlar, kislotaga bardoshli g‘ishtlar, TXA termoparasi, qattiq qotishmali burg‘ulash uskunasi, keramik tigellar, cho‘yan ustquyma, zanglamaydigan mufel, burg‘ulash dolotalari, volfram-misli gradiyent kontaktlari, molibdenli va volframli simlar, volfram hamda molibden nanokukunlari shular jumlasidandir.
Ishonchimiz komil, kombinatda samarali olib borilayotgan mahalliylashtirish dasturi ijrosi korxonamizning iqtisodiy rivojlanishida muhim ahamiyat kasb etadi.
Kozim Jumaboyev, OKMK mahalliylashtirish bo‘limi boshlig‘i
Ma’lumot sheriklik huquqi asosida tayyorlandi.
Izoh (0)