21-apreldan 25-aprelgacha Universal Jumping Agro ot sporti klubida sportning mana shu yo‘nalishi bo‘yicha xalqaro turnirlar — konkur bo‘yicha Jahon kubogi va Millatlar kubogi o‘tkazildi. Tantanali tadbirni Milliy olimpiya qo‘mitasi raisi Rustam Shoabdurahmonov va O‘zbekiston yilqichilik hamda ot sporti federatsiyasi rahbari Bahromjon Gaziyev ochib berdi.
5 kun davomida, 12 ta davlatdan kelgan qariyb 30 nafar ishtirokchi sovrinli o‘rinlar va Yevrosiyo ligasining final bosqichiga yo‘llanmani qo‘lga kiritish uchun kurashdi: O‘zbekiston, Qozog‘iston, Qirg‘iziston, Rossiya, Belarus, Armaniston, Ukraina, Germaniya, Niderlandiya, Finlyandiya, Eron va BAA.
Musobaqalar Xalqaro ot sporti federatsiyasi (FEI) va Yevrosiyo ot sporti assotsiatsiyasi boshchiligida bo‘lib o‘tdi. Tadbir nafaqat digital sohada, balki event-industriyada ham tutgan o‘rnini mustahkamlab borayotgan Chase Group kompaniyasi tomonidan tashkillashtirildi.
Musobaqalarning birinchi kuni — 22-aprelda g‘alaba O‘zbekiston vakillariga nasib etdi. Sovrinli o‘rinlar quyidagicha taqsimlandi:
Konkur-1, 120 santimetr balandlik:
1-o‘rin — Abdushukur Sobirjonov
2-o‘rin — Abduazim Ramzitdinov
3-o‘rin — Xurshid Alimjonov
Konkur-2, 140 santimetr balandlik:
1-o‘rin — Bekzod Qurbonov
2-o‘rin — Bekzod Qurbonov
3-o‘rin — Nurjon Tuyakbayev
Musobaqalarning ikkinchi kuni, 23-aprelda E guruhi to‘siqlar balandligi 140-150 santimetr bo‘lgan Gran-pri yo‘nalishi reytingidan o‘tdi. Birinchi o‘rinni Coco-Palla laqabli otda Qirg‘iziston vakili Rinat Galimov egalladi. O‘zbekistonlik chavandoz Bekzod Qurbonov King Cornet laqabli otda ikkinchi o‘rindan joy oldi. Sovrindorlar shohsupasining uchinchi o‘rni ham Bekzod Qurbonov va uning Sir Stenograph laqabli otiga nasib etdi.
Shuningdek, shu kunning o‘zida chavandozlar to‘siqlar balandligi 130 santimetr bo‘lgan konkurda ham bellashishdi, ushbu bellashuvda ham sovrinli o‘rinlar O‘zbekiston vakillariga nasib etdi:
1-o‘rin – A’zam Talibbayev
2-o‘rin – Umid Kamilov
3-o‘rin – G‘ayrat Nazarov
24-aprel kuni musobaqalar davom ettirildi. Musobaqalarning 3-kuni natijalari:
Konkur-5, 130 santimetr balandlik:
1-o‘rin – A’zam Talibbayev, Qirg‘iziston
2-o‘rin – Bahromjon Gaziyev, O‘zbekiston
3-o‘rin – Nurilla Turisbekova, Qozog‘iston
Konkur-6, 110 santimetr balandlik:
1-o‘rin – Zokir To‘rajonov, O‘zbekiston
2-o‘rin – Redko Radion, Ukraina
3-o‘rin – Ibragim Yo‘ldoshev, O‘zbekiston
Musobaqalarning yakunlovchi kuni — 25-aprelda Millatlar kubogi uchun jamoada bellashuvlar bo‘lib o‘tdi. Sovrinli o‘rinlar quyidagi ko‘rinishga ega bo‘ldi:
1-o‘rin — O‘zbekiston jamoasi (jamoa tarkibida Qurbonov Bekzod, Sobirjonov Oqiljon, Komilov Umid, Tuyakbayev Nurjon ishtirok etdi).
2-o‘rin — tarkibida Tryapitsin Andrey, Mamitov Sadir, Galimov Rinat, Sabitov Kamil ishtirok etgan Qirg‘iziston jamoasi.
3-o‘rin — Qozog‘iston jamoasi (ishtirokchilar: Turisbekov Nurilla, Dosali Nurlan, Malikajdar Chingiz, Popellyayev Oleg).
25-aprel kuni, shuningdek, O‘zbekiston yilqichilik va ot sporti federatsiyasi raisi kubogi uchun ham musobaqalar o‘tkazildi. Sovrinli o‘rinlarni quyidagilar egalladi:
1-o‘rin — Abduazim Ramzitdinov, O‘zbekiston
2-o‘rin — Rinat Galimov, Qirg‘iziston
3-o‘rin — Xurshidbek Alimjanov, O‘zbekiston
Jamoa musobaqalarida Millatlar kubogi va yakka tartibdagi chiqishlarda sovrinli o‘rinlarni egallashga muvaffaq bo‘lgan o‘zbek chavandozlarining a’lo darajadagi tayyorgarliklarini alohida ta’kidlab o‘tish joiz.
Eslatib o‘tamiz, Toshkentda Yevrosiyo ligasi debyut mavsumining birlashtirilgan birinchi bosqichi bo‘lib o‘tdi. Ligadagi Millatlar kubogi mavsumi yakunlariga ko‘ra, eng yaxshi deb topilgan jamoa Barselonada bo‘lib o‘tadigan Millatlar kubogi finalida ishtirok etish huquqini qo‘lga kiritadi. Ligadagi Jahon kubogi mavsumining Yevrosiyo bo‘yicha uchta eng yaxshi chavandozi esa Leypsigda o‘tkaziladigan Jahon kubogi finalida ishtirok etishi mumkin.
Reklama huquqi asosida.
Izoh (0)