AQSh Rossiyaning saylovlarga aralashuvi va kiberhujumlariga munosib javob qaytardi. Vashington Rossiya bilan munosabatlar keskinlashuvini istamaydi. Bu haqda AQSh prezidenti Jo Bayden Kongressdagi nutqida aytib o‘tdi, deb yozadi “Kommersant”.
“Rossiyaga kelsak, men Putinga ochiq aytdim, biz keskinlikni istamasak ham, ularning harakatlari chora ko‘rishga majbur qiladi. Men Rossiyaning saylovlarga aralashuviga, hukumatimiz va biznesimizga qilingan kiberhujumlarga to‘g‘ridan to‘g‘ri va mutanosib ravishda javob qaytardim ular qilgan ishiga yarasha javob oldi”, — dedi Bayden Kongressda. Uning chiqishi Amerika OAV tomonidan translyatsiya qilindi.
Davlat rahbari AQSh Rossiya bilan birgalikda mamlakatlar manfaatlarini birlashtiruvchi masalalarda hamkorlik qilishi mumkin, deb hisoblaydi. Misol tariqasida u “SNV III” (Rossiya va AQSh o‘rtasida strategik hujum qurollarini yanada kamaytirish va cheklash choralari to‘g‘risida shartnoma) uzaytirilgani va “iqlim inqirozi” bo‘yicha olib borilayotgan ishlarni keltirdi. Prezident iqlim sammitiga taklif qilinadigan mamlakatlar haqida gapirdi. Uning ta’kidlashicha, sammit dunyodagi barcha yirik iqtisodiyotga ega davlatlar bilan o‘tkaziladi: “Xitoy va Rossiyadan to Hindiston va Yevropa Ittifoqiga qadar”.
13-aprel kuni telefon orqali suhbatda Bayden Putinga neytral hudud sifatida “uchinchi mamlakatda” uchrashishni taklif qildi. Oq uy uchrashuv yozda bo‘lib o‘tishi mumkin, deb taxmin qildi. Kreml yozdagi uchrashuvni tasdiqlab, hozircha sanalar bo‘yicha kelishuv mavjud emasligini aytdi.
Bayden Putin bilan shaxsan uchrashganda boshqa masalalar qatori Ukrainadagi vaziyatni ham muhokama qilmoqchi.
“Bayden Vladimir Putinni yozda uchinchi mamlakatda uchrashib, bir qator mavzularni, shu jumladan Ukrainaning yaxlitligini muhokama qilishga taklif qildi. Qo‘shma Shtatlar boshqa sheriklar qatori Ukrainaning suvereniteti va yaxlitligini himoya qilishga qat’iy sodiqdir. Biz bundan keyin ham shunday qolishni niyat qildik, lekin ultimatum qo‘yish bilan emas, balki yuqori darajadagi diplomatik kanallar orqali”, — dedi Badenning milliy xavfsizlik bo‘yicha maslahatchisi Jeyk Sallivan.
Moskva va Vashington o‘rtasidagi munosabatlarning keskinlashuvi so‘nggi marta 15-aprel kuni, Amerika prezidenti Jo Bayden Rossiyaga nisbatan yangi sanksiyalar kiritganidan keyin yuz berdi. Yangi sanksiyalar Rossiyaning AQShdagi 2020-yilgi prezidentlik saylovlariga aralashishi, AQSh hukumat idoralariga qilingan kiberhujum va Rossiyaning Afg‘onistondagi amerikaliklarga qarshi “Tolibon” jangarilari bilan til biriktirgani bilan bog‘liq. Oq uy fevral oyida Rossiyaning ushbu harakatlari uchun AQSh rasmiylari unga qarshi sanksiyalar rejalashtirayotganini aytgandi.
Izoh (0)