Toshkentdagi “Shahidlar xotirasi” yodgorlik majmuasining atrofi o‘ralgani va u yerda qurilish ishlari boshlangani haqida xabar berilgandi. Qurilish vazirligi ushbu majmua rekonstruksiyadan keyin qanday ko‘rinishga kelishi haqida ma’lumot berdi, deya xabar qilmoqda “Daryo” muxbiri.
Vazirlar Mahkamasining 2021-yil 3-apreldagi 178-son qaroriga asosan ushbu joyda bir qator bunyodkorlik ishlari rejalashtirilgan. Qarorga ko‘ra majmuada:- qatag‘on qurbonlari nomlari aks ettirilgan ramziy kitob barpo etish;
- muzey binosi va ramziy rotondani, favvoralarni rekonstruksiya qilish;
- “Qatag‘on qurbonlari xotirasi” davlat muzeyi xodimlari uchun ma’muriy bino;
- majmuaga tashrif buyuruvchilar uchun qulay sharoit yaratish maqsadida milliy hunarmandchilik va savdo do‘konlari;
- sayr uchun veloturargohlar;
- bir qator suhbat joylari;
- ochiq amfiteatr va Wi-Fi hududi;
- bolalar va shaxmatchilar uchun o‘yin maydonchalari hamda hojatxonalar qurilishi ko‘zda tutilgan.
Ta’kidlanishicha, ochiq amfiteatr tantana va ko‘ngilochar tadbirlarni o‘tkazish uchun emas, balki qatag‘on qurbonlarining tarixiy merosini yanada chuqur o‘rganish va ularning xotirasini abadiylashtirishga doir tadbirlar tashkil etish uchun mo‘ljallangan.
Bundan avval Toshkent xalqaro aeroportining ikkinchi qavatiga olib boradigan estakada yo‘li ochilishi, Samarqand aeroporti boshqaruvini Air Marakanda kompaniyasiga berish rejalashtirilayotgani hamda “SUM”da quriladigan “Istiqlol” konsepsiyasi loyihasi yaqin kunlarda tasdiqlanishi ma’lum qilingani haqida xabar berilgandi.
Izoh (0)