Oylar sultoni — Ramazon: Ro‘zador kishi ro‘za tutmaganlarga ovqat sotsa bo‘ladimi? Ro‘zador holimda og‘riyotgan tomog‘imga spirt surishim mumkinmi?

“Daryo” internet-nashri va O‘zbekiston musulmonlari idorasining “Muslim.uz” portali o‘zaro hamkorlikda muborak oyga bag‘ishlangan “Oylar sultoni — Ramazon” loyihasini taqdim etadi.

Loyiha doirasida taniqli ulamolar va diniy soha xodimlari mohi Ramazon fazilati to‘g‘risidagi oyati karimalar, hadisi shariflar sharhi hamda ro‘za tutish bilan bog‘liq savollarga javob beradi.

Navbatdagi suhbat O‘zbekiston musulmonlari idorasi Fatvo bo‘limi mutaxassisi Zikriyo Boborahimov bilan uyushtirildi.

Ro‘zador odam ro‘za tutmagan odamlarga ovqat pishirib bersa bo‘ladimi?

Ramazon oyida kunduz kuni shar’iy uzrsiz ro‘za tutmagan kishilarga ovqat pishirib berish yoki pishirib sotish umuman mumkin emas. Bu Ramazon oyiga nisbatan va Allohning farz qilgan ro‘zasiga nisbatan hurmatsizlik bo‘ladi. Ro‘za Islomning katta shiorlaridan hisoblanib, uni ulug‘lash taqvodan bo‘ladi. Alloh taolo: “Ana shunday. Kim Allohning shiorlarini ulug‘lasa, bas, albatta, bu qalblarning taqvosidandir” (Haj surasi, 32-oyat). Vallohu a’lam.

Ro‘zador holimda shamollagan bo‘lsam, burnimga sprey-dori sepsam va tomog‘imga spirt surtsam bo‘ladimi?

Spreyning gazli (havoli)sidan yoki surtma (maz)ga o‘xshash, burunning ustiga surtsa hididan dimog‘ ochilib ketadigan vositalardan foydalangan ma’qul. Spreyning suyuqlik purkaydigani ro‘zani ochishi mumkin. Ro‘zador kishi tomog‘iga spirt surtsa bo‘ladi, uning ro‘zaga ta’siri yo‘q. Ammo spirt ichga o‘tib ketmasligi shart. Vallohu a’lam.

Ro‘za tutganman, ammo ro‘za tutganim yodimdan ko‘tarilib, “qornim ochib ketdi” deb yubordim. Gunoh bo‘lmaydimi, ro‘zaga ta’siri yo‘qmi?

Ro‘za tutgan kishi “qornim ochib ketdi” deyishi bilan ro‘zasi ochilmaydi va ro‘zadorligi yoddan chiqqanligi sabab bu bilan gunohkor bo‘lmaydi. Agar shu gapni ro‘zadan malollanib, Alloh taoloning farz qilgan ro‘zasidan siqilib aytsa, gunohkor bo‘ladi. Vallohu a’lam.

Ro‘zador odam qon tahlili topshirsa bo‘ladimi?

Ha, ro‘zador odam turli maqsadlarda qon topshirishi mumkin, bu ish bilan uning ro‘zasi ochilmaydi. Chunki ro‘za ichga kiruvchi narsalar sababli buziladi. Lekin ro‘zador qon topshirsa, zaiflashib qoladigan bo‘lsa, makruh bo‘ladi. Bu holatda qon topshirishni iftordan keyinga qoldirish maqsadga muvofiq. Vallohu a’lam.