Qirg‘iziston prezidenti Sadir Japarov nafaqat Issiqko‘l viloyatida, balki Bishkek shahri va boshqa viloyat markazlarida ham kazino ochilishi tashabbusini qo‘llab-quvvatladi. Bu haqda davlat rahbari 26-aprel kuni “Piramida” telekanaliga bergan intervyusida aytib o‘tdi, deb yozmoqda “Asia Plus”.
“Men prezident apparatiga mamlakatning barcha hududlari — Bishkek shahri va viloyatlarning markazlarida kazino ochish bo‘yicha Yuqori Kengashga taklif kiritishni topshirdim... Kazinolar 2015-yilgacha faoliyat yuritgan, istalgan odam kirib o‘ynashi mumkin edi. Bolalar kunlab vaqtini o‘sha yerda sarflagan holatlar ham bo‘lgan. Ba’zi deputatlar shuning bahonasida kazino egalariga tahdid qilgan. Ular tadbirkorlardan ‘ro‘yxatdan o‘tishni’ va millionlab dollar mablag‘ berishni talab qilgan, lekin kazino egalari davlatga soliq to‘layotganini aytib, buni rad etgan, natijada ularning faoliyatiga taqiq qo‘yilgan”, — dedi Japarov.
Shuningdek, prezident kazinolarning faqat chet elliklar uchun ochilishini taklif qildi. Qirg‘iziston fuqarolarining u yerga kirishi taqiqlanadi.
Mamlakatda kazino faoliyatiga 2012-yilning 21-aprelidan boshlab taqiq qo‘yilgan edi. Keyinchalik 2015-yilda totalizatorlar va bukmekerlik kontoralarining ham faoliyati to‘xtatilgan. Ushbu tashabbusga qarshi chiqqanlar qimor o‘yinlarining taqiqlanishi natijasida davlat budjeti 100 millionlab so‘m zarar ko‘rishi, 11 ming kishi ishsiz qolishini ta’kidlagan.
Keyinroq ushbu biznesni qayta tiklashga alohida urinishlar bo‘ldi — “Manas” va “O‘sh” aeroportlarida, shuningdek, Issiqko‘l va Batken viloyatlarida kazino ochish bo‘yicha takliflar berildi, lekin ular amaliyotga tatbiq etilmadi.
2021-yilning 21-aprel kuni Yuqori Kengash deputatlari Issiqko‘lda kazino ochilishi bo‘yicha qonun loyihasini birinchi o‘qishdayoq ma’qulladi. Hujjatga muvofiq, “Tamchi” aeroportining bazasida bir nechta mehmonxona va kazino uchun 1200 gektar yer maydoni ajratiladi.
Qirg‘iziston hukumati davlat va munitsipal mulkni, shuningdek, o‘ziga tegishli yer uchastkalarini maxsus ma’muriy okrugga soddalashtirilgan imtiyozli shartlar asosida topshiradi. Chet el fuqarolarining mamlakatga kelishi va chegaradan vizasiz o‘tishi uchun sharoit yaratiladi. Qonunga ko‘ra, kazino faqat shu hududda ishlaydi va Qirg‘iziston fuqarolarining u yerga kirishi taqiqlanadi.
Izoh (0)