Садир Жапаров Қирғизистоннинг барча ҳудудларида казино очишни таклиф қилди

Қирғизистон президенти Садир Жапаров нафақат Иссиқкўл вилоятида, балки Бишкек шаҳри ва бошқа вилоят марказларида ҳам казино очилиши ташаббусини қўллаб-қувватлади. Бу ҳақда давлат раҳбари 26 апрель куни «Пирамида» телеканалига берган интервьюсида айтиб ўтди, деб ёзмоқда «Asia Plus».

«Мен президент аппаратига мамлакатнинг барча ҳудудлари — Бишкек шаҳри ва вилоятларнинг марказларида казино очиш бўйича Юқори Кенгашга таклиф киритишни топширдим... Казинолар 2015 йилгача фаолият юритган, исталган одам кириб ўйнаши мумкин эди. Болалар кунлаб вақтини ўша ерда сарфлаган ҳолатлар ҳам бўлган. Баъзи депутатлар шунинг баҳонасида казино эгаларига таҳдид қилган. Улар тадбиркорлардан ‘рўйхатдан ўтишни’ ва миллионлаб доллар маблағ беришни талаб қилган, лекин казино эгалари давлатга солиқ тўлаётганини айтиб, буни рад этган, натижада уларнинг фаолиятига тақиқ қўйилган», — деди Жапаров.

Шунингдек, президент казиноларнинг фақат чет элликлар учун очилишини таклиф қилди. Қирғизистон фуқароларининг у ерга кириши тақиқланади.

Мамлакатда казино фаолиятига 2012 йилнинг 21 апрелидан бошлаб тақиқ қўйилган эди. Кейинчалик 2015 йилда тотализаторлар ва букмекерлик контораларининг ҳам фаолияти тўхтатилган. Ушбу ташаббусга қарши чиққанлар қимор ўйинларининг тақиқланиши натижасида давлат бюджети 100 миллионлаб сўм зарар кўриши, 11 минг киши ишсиз қолишини таъкидлаган.

Кейинроқ ушбу бизнесни қайта тиклашга алоҳида уринишлар бўлди — «Манас» ва «Ўш» аэропортларида, шунингдек, Иссиқкўл ва Баткен вилоятларида казино очиш бўйича таклифлар берилди, лекин улар амалиётга татбиқ этилмади.

2021 йилнинг 21 апрель куни Юқори Кенгаш депутатлари Иссиқкўлда казино очилиши бўйича қонун лойиҳасини биринчи ўқишдаёқ маъқуллади. Ҳужжатга мувофиқ, «Тамчи» аэропортининг базасида бир нечта меҳмонхона ва казино учун 1200 гектар ер майдони ажратилади.

Қирғизистон ҳукумати давлат ва муниципал мулкни, шунингдек, ўзига тегишли ер участкаларини махсус маъмурий округга соддалаштирилган имтиёзли шартлар асосида топширади. Чет эл фуқароларининг мамлакатга келиши ва чегарадан визасиз ўтиши учун шароит яратилади. Қонунга кўра, казино фақат шу ҳудудда ишлайди ва Қирғизистон фуқароларининг у ерга кириши тақиқланади.