Ukraina prezidenti Vladimir Zelenskiy Rossiya prezidenti Vladimir Putin bilan uchrashish uchun eng yaxshi joy Vatikan ekanini ma’lum qildi. Bu haqda Zelenskiy La Repubblica gazetasiga bergan intervyusida aytib o‘tdi, deb yozadi “RBK”.
“Ha, bu har tomonlama eng maqbul joy bo‘lishi mumkin. Vatikan tinchlik to‘g‘risida muloqotlar uchun haqiqatan ham ideal joy”, — degan Zelenskiy jurnalistning uchrashuv Rim yoki Vatikanda bo‘lishi mumkinmi, degan savoliga javoban.
Prezidentning izohlashicha, Muqaddas Taxt (Vatikan ma’muriyati) vositachi vazifasini bajaruvchi “global axloqiy hokimiyat”, chunki u “xolisdir va nizo tomonlarining barchasi unga ishonch bildiradi”.
“Rim Papasi o‘z kasbiga ko‘ra tinchlik avliyosidir. Bu bilan Vatikan boshqa dunyo mamlakatlaridan farq qiladi: u faqat ma’naviy kuch bo‘lib qoladi va hamisha hech qanday qiziqish, hech qanday harbiy-siyosiy va iqtisodiy manfaatlarsiz ish ko‘radi. Aynan shu sababli tarixda Vatikanga davlatlar o‘rtasidagi ziddiyatlarni hal qilish va tinch kelajakni barpo etish uchun tez-tez murojaat qilingan”, — dedi Zelenskiy.
Intervyuda Zelenskiy Donbassdagi vaziyatni muhokama qilish uchun Putin bilan uchrashuv bo‘lib o‘tishiga ishonch bildirdi. Hozircha uchrashuv tartibi, joyi va vaqti aniqlanmagan, dedi Zelenskiy va uning idorasi hamda Putin ma’muriyati o‘rtasida bevosita maslahatlashuvlar boshlanganda bularga aniqlik kiritilishini ta’kidladi.
“Men o‘z tomonimdan maslahatlarni tashkil qilish bo‘yicha barcha tegishli buyruqlarni allaqachon idora rahbari Andrey Yermakka berganman”, — dedi davlat rahbari.
Rossiya prezidentining matbuot kotibi Dmitriy Peskov Moskva va Vatikan prezidentlarning uchrashuvini Vatikan hududida o‘tkazish to‘g‘risida Kiyevdan rasmiy taklif olmaganini aytdi.
“Prezident Zelenskiy Vatikan uchrashuv uchun eng yaxshi joy bo‘lishi mumkinligini aytdi. Ammo Vatikan ham, Rossiya tomoni ham bundan rasman xabardor emas. Bizga bunday taklif konkretlashtirilgani va ishlab chiqilgani haqida hali hech qanday ma’lumot kelib tushmagan”, — dedi Peskov.
20-aprel kuni Zelenskiy Putinga Ukrainaning Donbassidagi urush ketayotgan istalgan joyida uchrashishni taklif qildi. Putin bunga javoban, agar Ukraina prezidenti Donbass muammosini muhokama qilmoqchi bo‘lsa, avval u Donetsk va Lugansk Xalq Respublikalarining rahbarlari bilan uchrashishi kerakligini va shundan keyingina uchinchi tomon sifatida Rossiya rahbariyati bilan uchrashishi mumkinligini aytdi. Shuningdek, u Rossiya tomonining Ukraina bilan ikki mamlakat o‘rtasidagi munosabatlar haqida gaplashishga tayyorligini aytdi va Zelenskiyni “o‘ziga qulay bo‘lgan istalgan vaqtda” Moskvaga kelishga taklif qildi.
Kiyev Zelenskiyning Putin bilan Moskvada uchrashishini imkonsiz deb atadi.
“Urush paytida prezident poytaxtga borib, tajovuzkor mamlakat vakili bo‘lgan odam bilan uchrasha olmaydi. Menimcha, bu biroz g‘alati taklif”, — dedi Ukraina bosh vaziri o‘rinbosari. Uning fikriga ko‘ra, bunday uchrashuv to‘rt mamlakat yetakchilari ishtirokidagi (Ukraina, Rossiya, Fransiya, Germaniya) “normandcha format” doirasida o‘tkazilishi kerak.
Izoh (0)