AQShda Texas A&M universiteti olimlari COVID-19’ni bir soniyada yoki undan ham tezroq yo‘q qilishga imkon beruvchi usulni kashf etdi. Bu haqda Phys.org nashriga tayanib, “RBK” xabar berdi.
Universitetning Elektron va kompyuter texnologiyalari kafedrasi professori Arum Xan o‘z xodimlari bilan birgalikda yuqori harorat yordamida ushbu natijaga erishdi. Nashrning ta’kidlashicha, koronavirusni zararsizlantirish uchun issiqlikdan foydalanish usuli ilgari ham namoyish qilingan, ammo avvalgi tadqiqotlarda virus harorat ta’sirida bir daqiqadan 20 daqiqagacha bo‘lgan. “Bu usul infeksiyani yo‘q qilishda amaliy yechim bo‘lmasligi mumkin, chunki uzoq vaqt davomida issiqlikni qo‘llash qiyin va qimmatga tushadi”, — deb ta’kidlaydi Phys.org.
“Xan va uning jamoasi hozirda issiqlik bilan ishlov berish koronavirusni bir soniyadan kamroq vaqt ichida to‘liq zararsizlantirishini ko‘rsatdi va COVID-19’ning, ayniqsa, havo tomchilari bilan tarqalishini kamaytirish mumkinligini isbotladi”, — deya qayd etadi nashr.
Tajriba davomida olimlar tarkibida koronavirus bor eritmani zanglamaydigan po‘latdan yasalgan trubaning qizdirilgan qismidan o‘tkazdi. Ma’lum bo‘lishicha, eritma qariyb yarim soniya davomida deyarli 72 darajagacha qizdirilsa, virus titri 100 ming marta kamayadi, bu esa uni zararsizlantirish uchun yetarli.
Tadqiqotchilar ushbu usulni isitish, shamollatish va havoni tozalash tizimlari yordamida qo‘llash mumkin deb hisoblamoqda.
2020-yil Fransiya Provans universiteti olimlari koronavirus qanday haroratda yo‘q bo‘lishini aniqlagan edi. Tajriba davomida ular virus hujayralarini bir soat davomida Selsiy bo‘yicha 60 daraja haroratda qizdirgan va issiqlik ta’siridan keyin ba’zi shtammlar ko‘payishi mumkinligini aniqlagan. Biroq 92 darajagacha haroratda 15 daqiqa qizdirilgandan so‘ng, koronavirus butunlay o‘lgan.
Aprel oyida Avstraliyaning Walter and Eliza Hall Institute of Medical Research instituti olimlari lamalar turiga kiruvchi alpokaning tanasi tabiiy ravishda odamlarga xos koronavirusga qarshi antitanalar ishlab chiqarishga qodir ekanini aniqladi. Ular ushbu kashfiyot infeksiyani davolashning yangi usulini yaratishga yordam berishi mumkinligini ma’lum qildi.
Avvalroq AQShning Biologik himoyaga qarshi kurash va tahlil milliy markazi olimlari quyosh nuri SARS-CoV-2 virusini yo‘q qilishi mumkinligini, ammo u quyosh nurlari ta’sir qilish davomiyligi, kengligi va kunning qaysi vaqtida ta’sir ko‘rsatishiga bog‘liqligini aniqlagandi.
Izoh (0)