Oliy Majlis Qonunchilik palatasining 27-aprel kuni o‘tkazilgan yalpi majlisida ikki deputat — Alisher Qodirov va Rasul Kusherbayev tortishib qoldi.
“Ayrim payt poylab yurgan ayirmachi va ‘moy sepuvchi’larga qo‘l kelmasligi uchun aytib qo‘ymoqchi edim: Alisher aka Qodirov bilan mening o‘rtamizda bo‘lgan noqulay bahs sababi til masalasida emas, ‘snos’ bilan bog‘liq edi”, — deya vaziyatni qisqacha izohlagan Rasul Kusherbayev.
Alisher Qodirov tortishuv mavzusi davlat hokimiyati organlarining noqonuniy qurilishlarni buzish bo‘yicha qarorlarini sudga berishda davlat bojini to‘lash yoki to‘lamaslik haqida bo‘lganini aytib, Rasul Kusherbayev o‘rtasida bo‘lib o‘tgan tortishuv juda ham normal holat ekanligini bildirgan.
“Menga qolsa, sudga murojaat uchun umuman to‘lovlarni har qanday shakli bekor qilinishi kerak, adolatni izlash tortishuvlari faqat va faqat sudda bo‘lsin. Sud hamma uchun oson ochiladigan eshik bo‘lsin. Rasul esa bu norma hokimiyatlarni noqonuniy buzish ishlarini yanada rag‘batlantiradi, degan xulosada. Tortishuv shu nuqtada bo‘ldi”, — degan Alisher Qodirov.
Deputat Davlat soliq qo‘mitasi bilan Kusherbayev o‘rtasidagi nizodan xabari bo‘lmaganini ham bildirib o‘tgan.
“Asabiy bo‘lishga asosi bor. Tortishuvimizdagi keskin so‘zlari uchun men ham Odob komissiyasiga murojaat qilganim rost. Lekin bu chaqiruvimni qaytib olaman. Qiyin paytda Rasulni qo‘llab-quvvatlaymiz. Hamkasbimizni sudga jalb qilinishiga rozilik bermoqchi emasmiz”, — degan Qodirov.
“Murakkab sharoitda hukumat ham noan’anaviy ishlashni o‘rganyapti. Parlament ham erkin muhitda ishlashni endi o‘rganyapti. Qo‘polroq gapirgani uchun parlament a’zosining javobgarlikka tortilishi demokratik islohotlarimiz ruhiga mos emas. Qancha tortishsak ham maqsadimiz bitta — O‘zbekistonimiz rivojlanishi kerak!”, — degan Alisher Qodirov.
Eslatib o‘tamiz, Davlat soliq qo‘mitasi Rasul Kusherbayevni sudga bergandi. Bunga deputatning “Human.uz” axborot portalidagi “So‘z blogerlarga” ko‘rsatuvining 23-fevraldagi sonida aytgan haqoratomuz so‘zlarini sabab qilib ko‘rsatgan. Qo‘mita deputatdan 4,6 milliard so‘m ma’naviy zarar undirmoqchi.
Izoh (0)