Prezident Shavkat Mirziyoyev 27-aprel kuni “O‘zbekiston Respublikasining Konstitutsiyaviy sudi to‘g‘risida”gi qonunni imzoladi, deb xabar beradi Telegram’dagi “Huquqiy axborot” kanali.
Qonunga ko‘ra, Konstitutsiyaviy sud doimiy faoliyat yurituvchi sud hokimiyati organi bo‘lib, qonun chiqaruvchi va ijro etuvchi hokimiyat hujjatlarining Konstitutsiyaga muvofiqligi to‘g‘risidagi ishlarni ko‘radi.
Konstitutsiyaviy sud konstitutsiyaviy huquq va erkinliklari muayyan ishda qo‘llanilgan va Konstitutsiyaga muvofiq bo‘lmagan qonunda buzilgan deb hisoblovchi fuqarolar hamda yuridik shaxslarning shikoyatlarini ham ko‘rib chiqishi belgilangan.
Konstitutsiyaviy sud rais va uning o‘rinbosarini qo‘shgan holda 9 nafar sudyadan iborat bo‘ladi (ilgari 7 nafar edi).
Konstitutsiyaviy sudga murojaat qilish huquqiga ega bo‘lgan subyektlar qatoriga quyidagilar kiritildi:
- Inson huquqlari bo‘yicha vakil (ombudsman) o‘rinbosari – Bola huquqlari bo‘yicha vakil;
- Inson huquqlari bo‘yicha O‘zbekistonning Milliy markazi;
- Prezident huzuridagi Tadbirkorlik subyektlarining huquqlari va qonuniy manfaatlarini himoya qilish bo‘yicha vakil.
Eslatib o‘tamiz, “O‘zbekiston Respublikasi Konstitutsiyaviy sudi to‘g‘risida”gi qonunning 25-moddasida Konstitutsiyaviy sudga ko‘rib chiqish uchun masalalar kiritish huquqi Oliy Majlisi palatalari, O‘zbekiston Prezidenti, Qonunchilik palatasining Spikeri, Senat raisi, Qoraqalpog‘iston Respublikasi Jo‘qorg‘i Kengesi, Qonunchilik palatasi deputatlari umumiy sonining kamida to‘rtdan bir qismidan iborat deputatlar guruhi, Senat a’zolari umumiy sonining kamida to‘rtdan bir qismidan iborat senatorlar guruhi, Oliy sud raisi, Oliy xo‘jalik sudi raisi, bosh prokuror, Hisob palatasining raisi hamda Konstitutsiyaviy sudning kamida uch sudyasidan iborat guruhiga berilgan edi.
Qonun rasmiy e’lon qilingan kundan e’tiboran kuchga kiradi.
Izoh (0)