Олий Мажлис Қонунчилик палатасининг 27 апрель куни ўтказилган ялпи мажлисида икки депутат — Алишер Қодиров ва Расул Кушербаев тортишиб қолди.
«Айрим пайт пойлаб юрган айирмачи ва ‘мой сепувчи’ларга қўл келмаслиги учун айтиб қўймоқчи эдим: Алишер ака Қодиров билан менинг ўртамизда бўлган ноқулай баҳс сабаби тил масаласида эмас, ‘снос’ билан боғлиқ эди», — дея вазиятни қисқача изоҳлаган Расул Кушербаев.
Алишер Қодиров тортишув мавзуси давлат ҳокимияти органларининг ноқонуний қурилишларни бузиш бўйича қарорларини судга беришда давлат божини тўлаш ёки тўламаслик ҳақида бўлганини айтиб, Расул Кушербаев ўртасида бўлиб ўтган тортишув жуда ҳам нормал ҳолат эканлигини билдирган.
«Менга қолса, судга мурожаат учун умуман тўловларни ҳар қандай шакли бекор қилиниши керак, адолатни излаш тортишувлари фақат ва фақат судда бўлсин. Суд ҳамма учун осон очиладиган эшик бўлсин. Расул эса бу норма ҳокимиятларни ноқонуний бузиш ишларини янада рағбатлантиради, деган хулосада. Тортишув шу нуқтада бўлди», — деган Алишер Қодиров.
Депутат Давлат солиқ қўмитаси билан Кушербаев ўртасидаги низодан хабари бўлмаганини ҳам билдириб ўтган.
«Асабий бўлишга асоси бор. Тортишувимиздаги кескин сўзлари учун мен ҳам Одоб комиссиясига мурожаат қилганим рост. Лекин бу чақирувимни қайтиб оламан. Қийин пайтда Расулни қўллаб-қувватлаймиз. Ҳамкасбимизни судга жалб қилинишига розилик бермоқчи эмасмиз», — деган Қодиров.
«Мураккаб шароитда ҳукумат ҳам ноанъанавий ишлашни ўрганяпти. Парламент ҳам эркин муҳитда ишлашни энди ўрганяпти. Қўполроқ гапиргани учун парламент аъзосининг жавобгарликка тортилиши демократик ислоҳотларимиз руҳига мос эмас. Қанча тортишсак ҳам мақсадимиз битта — Ўзбекистонимиз ривожланиши керак!», — деган Алишер Қодиров.
Эслатиб ўтамиз, Давлат солиқ қўмитаси Расул Кушербаевни судга берганди. Бунга депутатнинг «Human.uz» ахборот порталидаги «Сўз блогерларга» кўрсатувининг 23 февралдаги сонида айтган ҳақоратомуз сўзларини сабаб қилиб кўрсатган. Қўмита депутатдан 4,6 миллиард сўм маънавий зарар ундирмоқчи.
Изоҳ (0)