Indoneziya harbiy dengiz kuchlari suvosti kemasidagi buyumlar topilgani, 53 nafar ekipaj a’zosining hammasi halok bo‘lganini ma’lum qildi

Indoneziya harbiy dengiz kuchlari (HDK) qo‘mondonligi 21-aprelda yo‘qolgan suvosti kemasini izlash bo‘yicha operatsiyalar haqida ma’lumot berdi. Unga ko‘ra, kema bortidagi buyumlar, ekipaj a’zolarining joynamozlari, torpedo apparatining detallari va yog‘-yonilg‘i idishi topilgan, deb yozmoqda Associated Press.

Associated Press nashrining Indoneziya HDK shtabi boshlig‘i, admiral Yudo Margononing so‘zlaridan iqtibos keltirishicha, mazkur buyumlarning topilganligi kemaning cho‘kkani va ekipaj a’zolarining halok bo‘lganini anglatadi.

Agentlikning aniqlik kiritishicha, Indoneziya HDK kemaning cho‘kkanligi va dengizchilarning halok bo‘lganini rasman tan olgan.

KRI Nanggala-402 suvosti kemasi 21-aprelda Bali oroli yaqinidagi torpedolarni chiqarish bo‘yicha harbiy o‘quv mashg‘ulotlari vaqtida yo‘qolgan. Kema bortida 53 nafar odam bo‘lgan. Keyinchalik AQSh Indoneziyaning g‘oyib bo‘lgan suvosti kemasini qidirish uchun aviatsiya yuborishi, bedarak yo‘qolgan suvosti kemasida kislorod tamom bo‘lgani haqida xabarlar berilgan. Sodir bo‘lgan voqeaning kelib chiqish sabablari yuzasidan rasmiy taxminlar bildirilmagan.