Ҳиндистонда COVID-19 бўйича рекордлар фонида кислород танқислиги юзага келди. АҚШ Ҳиндистонга ёрдам кўрсатишга ваъда берди

Ҳиндистон касалхоналари мамлакатдаги коронавирус пандемияси фонида ўткир кислород етишмовчилигига дуч келди, деб ёзади «Интерфакс». COVID-19’га чалиниш ҳолатлари ва унинг оқибатидаги ўлимлар сони бўйича кетма-кет уч кундан буён рекорд ўрнатилмоқда.

Сўнгги бир кеча-кундузда 346 786 киши вирусга чалинган. 23 апрель, жума куни 2263 киши вафот этган, 24 апрель, шанба куни — 2624 киши.

Айни вақтда Жайпур касалхонасининг ўзидагина бир кечада 20 киши кислород етишмагани туфайли вафот этган. Деҳли касалхоналари ўз имкониятлари чегарасига яқинлашиб қолгани ҳақида огоҳлантирмоқда. Кўпчилик тиббий муассасаларда бўш жойлар йўқ, кислород танқислиги қайд этилмоқда.

Шифокорларнинг айтишича, яқин вақтлар ичида яна кўплаб беморлар вафот этади: улар сунъий нафас олдириш аппаратларига уланган бўлиб, кислородсиз яшаб кета олмайди. Деҳли бош вазири Арвинд Кежривал тўғридан-тўғри эфирда маълум қилишича, тиббий кислород ишлаб чиқарувчи корхоналар армия ёрдамида ҳукуматга ўтказилиши керак.

АҚШ ҳукумати Ҳиндистонда коронавирус инфекциясига чалиниш даражасининг кескин ўсиши муносабати билан мамлакатга қўшимча кўмак кўрсатади. Бу ҳақда АҚШ давлат котиби Энтони Блинкен Twitter’да маълум қилди.

«Биз COVID-19’нинг даҳшатли авж нуқтасига келиб қолган Ҳиндистон халқига ҳамдардлик билдирамиз. Шерикларимиз билан яқиндан ҳамкорлик қиляпмиз ва биз Ҳиндистон халқига ва соғлиқни сақлаш хизматларидаги қаҳрамонларга қўшимча ёрдам кўрсатамиз», — деб ёзди у.

BBC қайд этишича, 2021 йил бошида Ҳиндистон ҳукумати пандемияни назорат остига олдик, деб ўйлаган эди: февраль ўрталарида касалланиш кўрсаткичлари суткасига 11 мингтагача пасайган эди, мамлакатда вакцинация ҳам бошланган эди.

Аммо шундан кейин вируснинг янги штаммлари пайдо бўлиши натижасида касалланиш яна авж олди. Мамлакатда оммавий байрамлар ўтказилиши ҳам вазиятга таъсир қилди. Хусусан, диний Кумбха Мела байрамида миллионлаб зиёратчилар йиғилганди.

Жонс Ҳопкинс университети маълумотларига кўра, Ҳиндистонда пандемия бошидан буён 16,61 миллион киши вирусни юқтириб олган, 189 544 киши вафот этган.