Turkiya hukumati mamlakatda koronavirus tarqalishining kuchayishi fonida 23–25-aprel kunlari to‘liq komendantlik soati o‘rnatmoqda. Bu haqda Turkiya Ichki ishlar vazirligining rasmiy saytiga tayanib, “RIA-Novosti” xabar berdi.
Xabarga ko‘ra, o‘tgan juma, 16-aprel kuni Turkiyada koronavirus bilan kasallanishning kunlik o‘sishi pandemiya boshlanganidan beri maksimal darajani ko‘rsatdi — 63 082 kishi. 21-aprel, chorshanba kuni esa sutkalik o‘limlar soni 346 tani tashkil etib, mamlakatdagi rekord darajani qayd etdi.
23-aprel kuni Turkiyada Milliy mustaqillik va bolalar kuni nishonlanadi. Vazirlik ma’lumotlariga ko‘ra, shu munosabat bilan mamlakatda uydan chiqishni cheklash 22-aprel kuni soat 19:00 da boshlanadi va 26-aprel kuni soat 05:00 da tugaydi.
Komendantlik soati davomida Turkiya fuqarolari o‘z uylaridan soat 10:00 dan 17:00 gacha faqat oziq-ovqat do‘konlari va dorixonalarga, shifokor huzuriga va itlarni sayr qilish uchun chiqishi mumkin.
Turkiyada mart oyining oxirida koronavirus qayta avj ola boshladi. Shundan so‘ng mamlakat prezidenti Toyyib Rajab Erdo‘g‘on 58 ta shaharni COVID-19 yuqtirish xavfi yuqori bo‘lgan qizil hudud, deya e’lon qildi. Mazkur shaharlarda Turkiya aholisining 80 foizi istiqomat qiladi.
Turkiya sog‘liqni saqlash vaziri Faxriddin Koja mamlakat koronavirus pandemiyasining eng qiyin davrlardan birini boshdan kechirayotganini aytgandi. Vazir mamlakatning barcha hududlarida kasallanish o‘sib borayotganini ta’kidladi. Faxriddin Koja Turkiyadagi COVID-19 bilan bog‘liq vaziyatni baholash uchun mamlakatga Rossiya delegatsiyasining tashrif buyurishini ma’lum qildi.
Avvalroq Rossiya 15-apreldan 1-iyungacha Turkiyaga doimiy va charter reyslarni to‘xtatishi haqida e’lon qilgandi. Shuningdek, Rossiya bilan bir qatorda Xitoy va boshqa mamlakatlar ham Turkiya bilan parvozlarni to‘xtatishga qaror qildi. Xitoyning fuqaro aviatsiyasi ma’muriyati (CAAC) turk aviakompaniyalariga 19-apreldan boshlab to‘rt hafta davomida parvozlarni to‘xtatishga buyruq berilganini e’lon qildi.
Izoh (0)