Pokistonda Xitoy elchisini o‘ldirish maqsadida portlash sodir etildi — OAV (video)

Pokiston janubi-g‘arbiy qismida joylashgan Belujiston viloyati Kvetta shahridagi Serena mehmonxonasining avtoturargohida portlash sodir bo‘ldi. Hodisa oqibatida kamida to‘rt kishi halok bo‘lgan, 12 kishi jarohatlangan, deb yozadi Reuters.

Ma’lum bo‘lishicha, portlash voqea joyidan bir necha kilometr radiusdagi mahalliy aholiga ham eshitilgan. Portlash sodir bo‘lgan joyga favqulodda vaziyat xodimlari kelib, jabrlanganlarni kasalxonalarga yetkazishgan.

Taxminlarga ko‘ra, terakt tashkilotchilari xizmat safari chog‘ida ushbu mehmonxonaga joylashgan Xitoy elchisini o‘ldirmoqchi bo‘lgan. Pokiston ichki ishlar vaziri Shayx Rashid Ahmadning so‘zlariga ko‘ra, o‘sha paytda Xitoy elchisi Nong Rong tadbirdaligi sababli portlash paytida mehmonxonada bo‘lmagan. Hodisa diplomat mehmonxonaga qaytishidan bir necha daqiqa oldin yuz bergan.

BREAKING 🚨 Massive explosion in Quetta’s Serena Hotel in Pakistan. Four dead. Attack was reportedly aimed at Chinese Ambassador. Blast occurred just minutes before his arrival at the scene. pic.twitter.com/4gM7vqQ7qN

— Insider Paper (@TheInsiderPaper) April 21, 2021

Belujiston ichki ishlar vaziri Ziyaulla Langoning jurnalistlarga aytishicha, Nong “ko‘tarinki kayfiyatda” va uning Kvettaga tashrifi 22-aprel kuni yakunlanadi. Voqea joyidan olingan kadrlarda alanga ostida qolgan bir necha mashina va voqea joyiga shoshilayotgan tez yordam mashinalarini ko‘rish mumkin. Hodisa joyiga xavfsizlik kuchlari va sapyorlarning kuchaytirilgan otryadlari kelib, atrofni o‘rab olgan.

Avvalroq Indoneziyaning neftni qayta ishlovchi Pertamina Balongan zavodida sodir bo‘lgan yong‘in oqibatida 5 kishi qattiq kuygani, 15 kishi yengil jarohat olgani haqida xabar berilgandi. Mumbaydagi Dreams Mall savdo markazida joylashgan koronavirus bemorlari davolanayotgan Sunrise Hospital shifoxonasida sodir bo‘lgan yong‘in oqibatida esa 10 kishi halok bo‘lgan.