Туркия ҳукумати мамлакатда коронавирус тарқалишининг кучайиши фонида 23–25-апрель кунлари тўлиқ комендантлик соати ўрнатмоқда. Бу ҳақда Туркия Ички ишлар вазирлигининг расмий сайтига таяниб, «РИА-Новости» хабар берди.
Хабарга кўра, ўтган жума, 16 апрель куни Туркияда коронавирус билан касалланишнинг кунлик ўсиши пандемия бошланганидан бери максимал даражани кўрсатди — 63 082 киши. 21 апрель, чоршанба куни эса суткалик ўлимлар сони 346 тани ташкил этиб, мамлакатдаги рекорд даражани қайд этди.
23 апрель куни Туркияда Миллий мустақиллик ва болалар куни нишонланади. Вазирлик маълумотларига кўра, шу муносабат билан мамлакатда уйдан чиқишни чеклаш 22 апрель куни соат 19:00 да бошланади ва 26 апрель куни соат 05:00 да тугайди.
Комендантлик соати давомида Туркия фуқаролари ўз уйларидан соат 10:00 дан 17:00 гача фақат озиқ-овқат дўконлари ва дорихоналарга, шифокор ҳузурига ва итларни сайр қилиш учун чиқиши мумкин.
Туркияда март ойининг охирида коронавирус қайта авж ола бошлади. Шундан сўнг мамлакат президенти Тоййиб Ражаб Эрдўғон 58 та шаҳарни COVID-19 юқтириш хавфи юқори бўлган қизил ҳудуд, дея эълон қилди. Мазкур шаҳарларда Туркия аҳолисининг 80 фоизи истиқомат қилади.
Туркия соғлиқни сақлаш вазири Фахриддин Кожа мамлакат коронавирус пандемиясининг энг қийин даврлардан бирини бошдан кечираётганини айтганди. Вазир мамлакатнинг барча ҳудудларида касалланиш ўсиб бораётганини таъкидлади. Фахриддин Кожа Туркиядаги COVID-19 билан боғлиқ вазиятни баҳолаш учун мамлакатга Россия делегациясининг ташриф буюришини маълум қилди.
Аввалроқ Россия 15 апрелдан 1 июнгача Туркияга доимий ва чартер рейсларни тўхтатиши ҳақида эълон қилганди. Шунингдек, Россия билан бир қаторда Хитой ва бошқа мамлакатлар ҳам Туркия билан парвозларни тўхтатишга қарор қилди. Хитойнинг фуқаро авиацияси маъмурияти (CААC) турк авиакомпанияларига 19 апрелдан бошлаб тўрт ҳафта давомида парвозларни тўхтатишга буйруқ берилганини эълон қилди.
Изоҳ (0)