AQSh prezidenti Jo Bayden 20-asr boshlarida arman millatiga qarshi amalga oshirilgan ommaviy qirg‘inni genotsid sifatida tan olishga tayyor. Bu haqda The Wall Street Journal’iga asoslanib, “RBK” xabar berdi.
Xabarga ko‘ra, prezident armanlarga qarshi 1915-yildan boshlab Usmonli turklar tomonidan amalga oshirilgan deportatsiya, ocharchilik va qotillikni genotsid deb atashi mumkin. Bu haqda Bayden ushbu voqealarni yodga olish kuni bo‘lgan 24-aprel, shanba kuni prezidentning yillik murojaati chog‘ida bayonot e’lon qilishi mumkin.
Shu bilan birga, gazeta manbalari yakuniy qaror qabul qilinmaganini va Bayden o‘zidan avvalgi prezidentlar singari genotsid haqida so‘z yuritmasdan, ramziy murojaat bilan cheklanishi ham mumkinligini qo‘shimcha qildi.
Bir kun oldin Associated Press kongressmenlarning Baydenni armanlar genotsidini tan olishga chaqirgan bayonotini e’lon qildi. Kongressning 100 dan ortiq a’zolari bayonotni imzolagan.
Unda Baydenga 2019-yilda aytgan so‘zlari eslatilgan: AQSh armanlar genotsidi mavjudligini “uzil-kesil” tasdiqlashi kerak. “Genotsid faktini eslay olmaslik yoki tan olmaslik kelajakdagi ulkan jinoyatlar uchun yo‘l ochib beradi”, — degan edi Bayden o‘sha paytda.
Mart oyida tarkibida ikkala partiya a’zolari bo‘lgan senatorlar guruhi Baydenga xuddi shunday xat bilan murojaat qilgan edi.
WSJ AQShning armanlar genotsidini tan olishi Turkiya bilan munosabatlarga ta’sir qilishi mumkinligidan ogohlantiradi. Bu haqda 20-aprel kuni Turkiya tashqi ishlar vaziri Mevlut Chavusho‘g‘li aytib o‘tdi. Xususan, uning ta’kidlashicha, agar Vashington Anqara bilan munosabatlarni yomonlashtirmoqchi bo‘lsa, unda bu uning tanlovidir.
Turli xil hisob-kitoblarga ko‘ra, armanlarga nisbatan qirg‘in paytida 660 mingdan 1,5 milliongacha odam o‘ldirilgan. Turkiya ham Ozarbayjon singari 1915-yil voqealarini genotsid deb tan olmaydi, ammo ushbu xalq orasida ko‘plab qurbonlar bo‘lganini inkor etmaydi. 2014-yilda Turkiya bosh vaziri Rajab Toyyib Erdo‘g‘on mamlakat parlamentida nutq so‘zlab, XX asr boshlarida arman millatiga qarshi amalga oshirilgan ommaviy qirg‘in natijasida halok bo‘lganlarning avlodlariga ilk bor hamdardlik bildirgan edi.
Izoh (0)