Butun Rossiya bo‘ylab Navalniyni qo‘llab-quvvatlab o‘tkazilgan aksiyalarda 1700 ga yaqin odam hibsga olindi (foto)

Rossiya shaharlarida 21-aprel kuni muxolifatchi Aleksey Navalniyni qo‘llab-quvvatlash bo‘yicha kelishilmagan harakatlar bo‘lib o‘tdi. Aksiya talablari orasida muxolifatchiga malakali tibbiy yordam ko‘rsatish ham bor. Real vaqt rejimida hisoblab boruvchi “OVD-Info” xaritasiga ko‘ra, namoyishda 1691 kishi hibsga olingan. Qo‘lga olinganlarning eng ko‘pi Sankt-Peterburg shahriga to‘g‘ri kelmoqda — 774 kishi. Aksiya Moskvada qay ko‘rinishda bo‘lib o‘tgani haqida “RBK” fotoreportaj tayyorladi.

21-aprel, chorshanba kuni ertalab Moskva markazidagi Kreml va “Manej” markaziy ko‘rgazma zalining qarshisida joylashgan Moskva davlat universitetining jurnalistika fakultetida ta’lim masofaviy rejimga o‘tkazilishi ma’lum bo‘ldi. Ma’muriyat buni Putinning Federal majlisga murojaat yo‘llashi munosabati bilan yuzaga kelishi mumkin bo‘lgan to‘qnashuvlar bilan izohladi. (tadbir chorshanba kuni tushdan keyin “Manej”da bo‘lib o‘tdi)

31-mart kuni Navalniy ochlik e’lon qilgan edi. U beli va oyog‘ida og‘riq zo‘raygani, ammo unga kerakli dorilar berilmagani va shifokorlar yuborilmagani sababli shunday qarorga kelganini aytgan. Moskvalik olim Navalniy bilan birdamlik belgisi sifatida ochlik aksiyasi e’lon qildi. O‘nlab odamlar uni qo‘llab-quvvatlagan. Olim o‘z harakatining asosiy maqsadi koloniyadagi Navalniyni shifokor tekshiruvdan o‘tkazishga va unga malakali tibbiy yordam ko‘rsatishga chaqirish ekanini ta’kidlagan.

“20-aprel kuni Vladimir viloyatidagi davlat kasalxonalarining fuqarolik shifokorlari Aleksey Navalniy yoniga tashrif buyurdi”, — dedi Rossiyadagi inson huquqlari bo‘yicha ombudsman Tatyana Moskalkova. Uning so‘zlariga ko‘ra, Navalniyning sog‘lig‘i to‘g‘risida hozircha “jiddiy tashvish” mavjud emas.