Maktabgacha ta’lim vazirligi Samarqand shahrida 2 hafta davomida olib borilgan o‘rganish ishlari natijalarini ma’lum qildi, deb xabar beradi “UzNews.uz”.
Vazirlik axborot xizmati rahbari Mavluda Asqarxo‘jayevaning so‘zlariga ko‘ra, shahardagi 58-sonli bog‘chada 141 nafar tarbiyalanuvchi ta’lim olayotgani xabar qilingan. Ammo amalda bu raqam 186 ta ekani aniqlangan. Guruh quvvatlari kichik guruh uchun 49 taga, tayyorlov guruhi uchun 45 tagacha oshirilgan.
Shuningdek, 8 nafar tarbiyalanuvchi bog‘chadan ketgan bo‘lishiga qaramay, ular OpenEMIS tizimidagi ro‘yxatdan o‘chirilmagan. Bu bo‘sh o‘rinlarning shakllantirilmasligiga hamda guruhlarga bolalar noqonuniy qabul qilinishiga sabab bo‘lgan.
Ushbu bog‘cha direktori tashkilotda ishlamagan 5 nafar shaxsga jami 17 million 793 ming ish haqi va unga tenglashtirilgan to‘lovlarni bergan. Ma’lum bo‘lishicha, mazkur tashkilot direktori 2019-yilda avgust—sentabr oylarida 31 nafar tarbiyalanuvchini qalbaki yo‘llanmalar orqali qabul qilingani sabab unga nisbatan Samarqand shahar prokuraturasi tomonidan jinoyat ishi qo‘zg‘atilgan.
Bundan tashqari, 7-sonli maktabgacha ta’lim tashkilotida OpenEMIS tizimida 14 ta guruhda 348 nafar bola ko‘rsatilgan, lekin 12 ta guruhda 275 nafar bola borligi ma’lum bo‘lgan, ularning 29 tasida yo‘llanmalar mavjud emas. Bundan tashqari, ta’minotchi tomonidan MTTga sariyog‘ o‘rniga “Spred” (sut yog‘i o‘rnini bosuvchi modda) mahsuloti olib kelingani aniqlangan.
31-MTTda ishchi guruh o‘rganishlar olib borayotgan paytda, oshpaz pishib turgan ovqatga xom tovuq go‘shtini solgan, ya’ni me’yor talabidagi go‘sht mahsuloti pishgan ovqatda xomligicha qolgan.
Shuningdek, viloyatdagi 38-MTT binosida qulflangan xona borligi, unda 20 ta bolalar karavot va 10 nafar bola borligi aniqlangan. OpenEMIS tizimida 14 ta guruhda 348 nafar bola bo‘lib, haqiqatda esa 12 ta guruhda 275 nafar bolani tashkil etmoqda, ularning 29 tasida yo‘llanmalar mavjud emas.
Shuningdek, Samarqand shahridagi 50, 126, 13 va 98-sonli maktabgacha ta’lim tashkilotlari faoliyati o‘rganilganida, ularda ham COVID-19 pandemiyasi qoidalariga rioya etilmagani aniqlangan.
O‘rganish natijalarida maktabgacha ta’lim vaziri ishtirokida faoliyatida kamchilikka yo‘l qo‘ygan mudiralar bilan tanqidiy-tahliliy uchrashuv o‘tkazilgan, ayrimlari bilan mehnat shartnomasi bekor qilingan.
Avvalroq Namangandagi bog‘cha tarbiyalanuvchisi issiq suvdan kuyib vafot etishi ortidan MTT direktori va bir necha xodim ishdan bo‘shatilgani, Surxondaryoda bolalarga qo‘pol munosabatda bo‘lgan tarbiyachi ishdan olingani, Farg‘onada 2 tup chinor va bir tup tolni noqonuniy kestirgan bog‘cha mudirasiga 15 million so‘m jarima yozilgani to‘g‘risida xabar berilgandi.
Izoh (0)