Farg‘onada 79 million so‘mdan ortiq budjet mablag‘ini talon-toroj qilgan politexnika instituti mutasaddilariga jinoyat ishi qo‘zg‘atildi. Bu haqda “Daryo”ga viloyat prokuraturasi axborot xizmati ma’lum qildi.
Ta’kidlanishicha, viloyat prokuraturasi tomonidan Farg‘ona politexnika institutida ta’lim, budjet va mehnat qonunchiligi ijrosi o‘rganilgan.
O‘rganish davomida institut mansabdor shaxslari 2019—2020-yillar davomida 600 million so‘mdan ortiq, juda ko‘p miqdorda budjet va smeta-shtat intizomi buzilishiga yo‘l qo‘yib, o‘zlariga ishonib topshirilgan 79,5 million so‘m budjet mablag‘larini rastarata qilish yo‘li bilan talon-toroj qilganligi aniqlangan.
Bundan tashqari, qonunchilikka zid ravishda qabul qilingan hujjatlarga nisbatan 9 ta protest keltirilgan, 9 nafar mansabdor va mas’ul xodimga nisbatan intizomiy javobgarlik to‘g‘risida ish qo‘zg‘atilgan.
Mazkur holat yuzasidan viloyat prokuraturasi tomonidan Jinoyat kodeksining 184-1-moddasi 2-qismi (budjet va smeta-shtat intizomini buzish), 167-moddasi 2-qismi (o‘zlashtirish yoki rastrata yo‘li bilan talon-toroj qilish) bilan jinoyat ishi qo‘zg‘atilgan.
Hozirda Farg‘ona shahar prokuraturasi tomonidan dastlabki tergov harakatlari olib borilmoqda.
Izoh (0)