O‘zbekiston bo‘ylab 19-aprel kuni 2—10 yoshdagi (jami 6 million 115 ming nafardan ortiq) bolalar hamda zararlanish yuqori bo‘lgan hududlar (Buxoro, Qashqadaryo, Surxondaryo, Sirdaryo, Toshkent va Farg‘ona viloyatlari hamda Qoraqalpog‘iston Respublikasi)dagi maktablarda 15 yoshgacha (jami 445 ming nafardan ortiq) maktab o‘quvchilari orasida ichak gelmintozi bilan kasallanishning oldini olish bo‘yicha ommaviy tadbirlar boshlandi. Bu haqda Sog‘liqni saqlash vazirligi xabar qildi.
Ushbu tadbirlarning 1-turi 2021-yilning 19—24-aprel kunlari davom etadi.
Gelmintozlar inson organizmiga parazit chuvalchanglar (gijjalar) kirishi natijasida yuzaga keladi. Chuvalchanglar o‘zi yashab turgan vujuddagi oziqalar hisobiga kun ko‘radi.
- bolaning qorni og‘riydi;
- ishtahasi buziladi;
- asabiylashadi;
- jizzaki bo‘lib qoladi;
- uyqusida tishlarini g‘ichirlatadi.
Sanitariya-epidemiologik osoyishtalik va jamoat salomatligi xizmatining taqsimotiga ko‘ra, maxsus dori vositalari ommaviy degelmintizatsiyaning 1-turini tashkillashtirish uchun hududlarga yetkazib berildi.
Bolalar preparatlarni bog‘cha va maktablarda qabul qilmoqda, shuningdek, uyda tarbiyalanayotganlarga esa birlamchi tibbiy-sanitariya yordami muassasalari va Sanitariya-epidemiologik osoyishtalik va jamoat salomatligi xizmatining hududiy bo‘linmalari tomonidan tashkil qilingan guruhlar mahallabay tarzda uyma-uy yurib, maxsus dori vositalarini tarqatmoqda.
Ommaviy degelmintizatsiya tadbirlari Prezidentning 2021-yil 3-fevraldagi “2017—2021 yillarda O‘zbekiston Respublikasini rivojlantirishning beshta ustuvor yo‘nalishi bo‘yicha Harakatlar strategiyasini ‘Yoshlarni qo‘llab-quvvatlash va aholi salomatligini mustahkamlash yili’da amalga oshirishga oid Davlat dasturi to‘g‘risida”gi farmoni hamda 2020-yil 10-noyabrdagi “Aholining sog‘lom ovqatlanishini ta’minlash bo‘yicha qo‘shimcha chora-tadbirlar to‘g‘risida”gi qarorining ijrosi asosida tashkil qilinmoqda.
Ommaviy degelmintizatsiya tadbirlarining 2-turi 6 oydan so‘ng tashkil qilinishi ko‘zda tutilgan.
Izoh (0)