Фарғонада 79 миллион сўмдан ортиқ бюджет маблағини талон-торож қилган политехника институти мутасаддиларига жиноят иши қўзғатилди. Бу ҳақда «Дарё»га вилоят прокуратураси ахборот хизмати маълум қилди.
Таъкидланишича, вилоят прокуратураси томонидан Фарғона политехника институтида таълим, бюджет ва меҳнат қонунчилиги ижроси ўрганилган.
Ўрганиш давомида институт мансабдор шахслари 2019—2020 йиллар давомида 600 миллион сўмдан ортиқ, жуда кўп миқдорда бюджет ва смета-штат интизоми бузилишига йўл қўйиб, ўзларига ишониб топширилган 79,5 миллион сўм бюджет маблағларини растарата қилиш йўли билан талон-торож қилганлиги аниқланган.
Бундан ташқари, қонунчиликка зид равишда қабул қилинган ҳужжатларга нисбатан 9 та протест келтирилган, 9 нафар мансабдор ва масъул ходимга нисбатан интизомий жавобгарлик тўғрисида иш қўзғатилган.
Мазкур ҳолат юзасидан вилоят прокуратураси томонидан Жиноят кодексининг 184-1-моддаси 2-қисми (бюджет ва смета-штат интизомини бузиш), 167-моддаси 2-қисми (ўзлаштириш ёки растрата йўли билан талон-торож қилиш) билан жиноят иши қўзғатилган.
Ҳозирда Фарғона шаҳар прокуратураси томонидан дастлабки тергов ҳаракатлари олиб борилмоқда.
Изоҳ (0)