Estoniya tashqi ishlar vaziri Eva-Mariya Liymets agar Aleksey Navalniydan murojaat tushsa, mamlakat siyosatchi uchun boshpana berish masalasini ko‘rib chiqishga tayyor ekanini ma’lum qildi, deb yozmoqda “Interfaks”.
“Estoniya bu masalani jiddiy ko‘rib chiqqan bo‘lar edi. Lekin Rossiya Aleksey Navalniyni ozod qilsa, aynan siyosatchining o‘zi qaysi mamlakatga murojaat qilishni hal qiladi. Rossiya janob Navalniyga bunday imkoniyatni taqdim qilsa, albatta, juda yaxshi bo‘lar edi”, — dedi tashqi ishlar vaziri.
“Biz kecha Yevropa Ittifoqida Aleksey Navalniyning hibsga olinishi munosabati bilan Rossiyada inson huquqlarining buzilishini qoralovchi qo‘shma bayonot chiqardik. Uning sog‘lig‘i yomonlashayotganini ko‘rib turibmiz”, — deb ta’kidladi Liymets.
Lekin tashqi ishlar vaziri Estoniyaning sobiq prezidenti Toomas Xendrik Ilves tomonidan berilgan rossiyaliklarning Yevropa Ittifoqiga kirishini taqiqlash taklifini ma’qullamadi.
“Biz, shubhasiz, Rossiyadagi demokratik kuchlar va fuqarolik jamiyatini qo‘llab-quvvatlaymiz. Shu nuqtayi nazardan odamlar orasidagi muloqot juda muhim”, — dedi Liymets.
“Mamlakatimizga Rossiyadan oddiy odamlar keladi. Shubhasiz, bizda bunday munosabatlar imkoniyati bo‘lishi, madaniy aloqalarni davom ettirish, Rossiya fuqarolik jamiyatining mustahkam bo‘lishiga yordam berish uchun rag‘batlantirishimiz kerak”, — deb ta’kidladi tashqi ishlar vaziri.
“Iv Roshe” ishi bo‘yicha Navalniyning shartli jazosi haqiqiy jazo bilan almashtirildi, hozirda u Vladimir viloyatidagi koloniyada saqlanmoqda. Sog‘lig‘i yomonlashgani sababli u Vladimir shahrida qattiq rejimli koloniya qoshidagi sil kasalliklari o‘tkazildi. Rossiya va boshqa davlatlarning siyosatchilari va jamoat arboblari Navalniyga zarur bo‘lgan davolanish choralarining ko‘rsatilishini talab qilmoqda. Kreml xorijiy davlatlarning rossiyalik mahbuslar sog‘lig‘i bilan qiziqmasligi kerakligini aytdi.
Avvalroq Polsha, Britaniya va NATO AQShning Rossiyaga qarshi sanksiyalarini qo‘llab-quvvatladi. Shunday bo‘lishiga qaramay, Bayden va Putinning uchrashuvi o‘z kuchida qolishi ma’lum qilindi.
Shuningdek, Jo Bayden Rossiya hukumatining “zararli tashqi harakatlari” tufayli unga qarshi sanksiyalar joriy qilgandan so‘ng, 15-aprel kuni Rossiya haqida bayonot chiqardi.
“Agar Rossiya bizning demokratiyamizga aralashishda davom etsa, men bunga javoban keyingi choralarni ko‘rishga tayyorman. Bu mening AQSh prezidenti sifatidagi vazifam”, — dedi Bayden Oq uydagi bayonotida.
Izoh (0)