Migel Dias-Kanel Kuba kommunistik partiyasi markaziy kengashi rahbarligiga saylandi. U Raul Kastro o‘rnini egallaydi

Kuba kommunistik partiyasining VIII qurultoyida markaziy kengashning yangi tarkibi saylab olindi. Kommunistik partiyaning Twitter’dagi sahifasida berilgan xabarga ko‘ra, mamlakat prezidenti Migel Dias-Kanel markaziy kengashning birinchi kotibi etib saylangan.

“Migel Duas-Kanel Bermudes Kuba kommunistik partiyasining birinchi kotibi etib saylandi”, – deyiladi xabarda.

https://twitter.com/PartidoPCC/status/1384145612300374024

Cubadebate portalining yozishicha, qurultoyning yopilishida kommunistik partiyaning sobiq birinchi kotibi Raul Kastro oxirgi uch yil ichida Dias-Kanelning partiya oliy organlari, davlat va hukumatni birlashtira oladigan jamoa shakllantira olganini qayd etgan. U partiyaning yuqori turuvchi organlaridan tushayotgan takliflarni rad etishi, biroq “Inqilob jangchisi” bo‘lib qolishini ta’kidlagan.

2003-yilda Migel Dias-Kanel Olgin provinsiyasidan partiya kengashining birinchi kotibligiga salangan, shu yilning o‘zida Davlat kengashi raisining birinchi o‘rinbosari Raul Kastroning taklifi asosida Kommunistik partiya markaziy kengashining siyosiy byurosi tarkibiga kiritilgan edi. U o‘shanda partiya organining eng yosh a’zosiga aylangan. Kastro Dias-Kanelni tanishtirgan vaqtda uning mafkura uchun ishonch bilan xizmat qilishi, qat’iyatli va ishga sidqidildan yondashadigan, pishiq-puxta bo‘lishga intiluvchi shaxs sifatida bilishini aytib o‘tgan. 2009-yil may oyida Raul Kastro Davlat kengashi raisi va Vazirlar kengashi rahbari sifatida Migel Dias-Kanelni mamlakat oliy ta’lim vaziri lavozimiga tayinlagan. Dias-Kanel ushbu lavozimda 2012-yil mart oyiga qadar faoliyat olib bordi va shu yili Vazirlar kengashi raisining o‘rinbosari lavozimiga o‘tkazildi.

2013-yil 3-fevralda Dias-Kanel xalq boshqaruvi milliy assambleyasining (Kubada bir palatali parlament) deputatligiga saylandi. Shu yili 24-fevralda Davlat kengashi va Vazirlar kengashi raisining birinchi o‘rinbosari lavozimini egalladi. Shu vaqtdan boshlab uning Kastro merosxo‘ri bo‘lishi haqida taxminlar paydo bo‘la boshlagan. 2018-yil 19-aprelda o‘tkazilgan saylovlarda Dias-Kanel Davlat kengashi va vazirlar kengashining raisligiga saylangan.

2019-yil apreldan Kubada yangi konstitutsiya kuchga kirdi va unga muvofiq davlat boshqaruvining shakli o‘zgardi: prezident hamda bosh vazir lavozimlari joriy etildi. 2019-yil 10-oktabrda parlamentning navbatdan tashqari yig‘ilishida Dias-Kanel mamlakat prezidentligiga saylandi.