AQShning o‘nlab qiruvchi samolyotlari Polshaga kirib keldi, Pentagon buni “odatiy harbiy mashg‘ulotlar” bilan izohladi

Polsha Mudofaa vazirligi respublikaga “AQShning bir necha o‘nlab samolyotlari” yetib kelganini ma’lum qildi, bunda gap F15 va F16 qiruvchilari haqida bormoqda.

Pentagon bosh kotibi Jon Kirbi brifingda ma’lum qilishicha, Amerika qiruvchi samolyotlarining Polshaga tashlanishi harbiy mashg‘ulotlar bilan bog‘liqdir.

U respublikaga qiruvchilarning yuborilishi hamda Rossiya va Ukraina chegarasidagi vaziyat o‘rtasidagi bog‘liqlikni inkor qildi.

“Bu Ukraina bilan chegaradagi yoki Qrimdagi voqealarga nisbatan javob choralari emas. Bu odatiy manyovrlar. Biz buni muntazam amalga oshirib turamiz”, — dedi Kirbi va bunday o‘quv mashg‘ulotlari AQShning Yevropadagi aylanma ishtirokining bir qismi ekanini qo‘shib qo‘ydi.

Yevroittifoq va AQSh Ukraina bilan chegara yaqinida Rossiya qo‘shinlarining to‘plangani haqidagi xabarlar yuzasidan bir necha marta xavotir bildirgan, G‘arb Rossiyani qo‘shinlarini olib ketishga chaqirgan edi.

Mart oyi oxirida The New York Times gazetasi 4 ming rus qo‘shini Ukraina chegaralariga, xususan, Rostov, Bryansk, Voronej viloyatlari va Qrimga yuborilgani haqida xabar berdi. Hammasi bo‘lib, Rossiya Qurolli Kuchlarining 28 ta taktik batalyon guruhi chegaralar bo‘ylab joylashtirilgan. Conflict Intelligence Team surishtiruv guruhi Rossiya qo‘shinlarining Rossiya—Ukraina chegarasi hududida to‘planishini 2014—2015-yillardan beri eng keskin ko‘rsatkich deb atadi.  Kiyev o‘z chegaralari yaqinida rus qo‘shinlari to‘planganini tasdiqladi va uni “o‘z kuchini ko‘z-ko‘z qilish” deb atadi. AQSh Rossiyadan mazkur “provokatsiyalar”ga izoh berishni talab qildi, shuningdek, AQSh prezidenti Jo Bayden lavozimiga kelganidan beri birinchi marta Ukraina rahbari Vladimir Zelenskiyga qo‘ng‘iroq qildi. Kremlning ta’kidlashicha, Rossiya o‘z hududida o‘z qo‘shinlarini harakatga keltirmoqda va “bu hech kimni bezovta qilmasligi kerak, qo‘shin hech kimga tahdid solmaydi”.