Эстония ташқи ишлар вазири Эва-Мария Лийметс агар Алексей Навальнийдан мурожаат тушса, мамлакат сиёсатчи учун бошпана бериш масаласини кўриб чиқишга тайёр эканини маълум қилди, деб ёзмоқда «Интерфакс».
«Эстония бу масалани жиддий кўриб чиққан бўлар эди. Лекин Россия Алексей Навальнийни озод қилса, айнан сиёсатчининг ўзи қайси мамлакатга мурожаат қилишни ҳал қилади. Россия жаноб Навальнийга бундай имкониятни тақдим қилса, албатта, жуда яхши бўлар эди», — деди ташқи ишлар вазири.
«Биз кеча Европа Иттифоқида Алексей Навальнийнинг ҳибсга олиниши муносабати билан Россияда инсон ҳуқуқларининг бузилишини қораловчи қўшма баёнот чиқардик. Унинг соғлиғи ёмонлашаётганини кўриб турибмиз», — деб таъкидлади Лийметс.
Лекин ташқи ишлар вазири Эстониянинг собиқ президенти Тоомас Хендрик Ильвес томонидан берилган россияликларнинг Европа Иттифоқига киришини тақиқлаш таклифини маъқулламади.
«Биз, шубҳасиз, Россиядаги демократик кучлар ва фуқаролик жамиятини қўллаб-қувватлаймиз. Шу нуқтаи назардан одамлар орасидаги мулоқот жуда муҳим», — деди Лийметс.
«Мамлакатимизга Россиядан оддий одамлар келади. Шубҳасиз, бизда бундай муносабатлар имконияти бўлиши, маданий алоқаларни давом эттириш, Россия фуқаролик жамиятининг мустаҳкам бўлишига ёрдам бериш учун рағбатлантиришимиз керак», — деб таъкидлади ташқи ишлар вазири.
«Ив Роше» иши бўйича Навальнийнинг шартли жазоси ҳақиқий жазо билан алмаштирилди, ҳозирда у Владимир вилоятидаги колонияда сақланмоқда. Соғлиғи ёмонлашгани сабабли у Владимир шаҳрида қаттиқ режимли колония қошидаги сил касалликлари ўтказилди. Россия ва бошқа давлатларнинг сиёсатчилари ва жамоат арбоблари Навальнийга зарур бўлган даволаниш чораларининг кўрсатилишини талаб қилмоқда. Кремль хорижий давлатларнинг россиялик маҳбуслар соғлиғи билан қизиқмаслиги кераклигини айтди.
Аввалроқ Польша, Британия ва НАТО АҚШнинг Россияга қарши санкцияларини қўллаб-қувватлади. Шундай бўлишига қарамай, Байден ва Путиннинг учрашуви ўз кучида қолиши маълум қилинди.
Шунингдек, Жо Байден Россия ҳукуматининг «зарарли ташқи ҳаракатлари» туфайли унга қарши санкциялар жорий қилгандан сўнг, 15 апрель куни Россия ҳақида баёнот чиқарди.
«Агар Россия бизнинг демократиямизга аралашишда давом этса, мен бунга жавобан кейинги чораларни кўришга тайёрман. Бу менинг АҚШ президенти сифатидаги вазифам», — деди Байден Оқ уйдаги баёнотида.
Изоҳ (0)