Janubiy Afrikaning Kryuger milliy bog‘ida sheriklari bilan brakonyerlikda gumon qilinayotgan shaxs xavfsizlik xizmati xodimlaridan berkinishga urinib, fillar to‘dasiga duch keldi va ularning ayovsiz hujumiga uchradi, deb yozmoqda Tengrinews.
Xabar berilishicha, milliy bog‘ hududini qo‘riqlash paytida xavfsizlik xizmati xodimlari uch nafar qonunbuzarni payqab qolgan va ularni ta’qib qila boshlagan.
“Fillarni noqonuniy ovlashda gumon qilinayotganlar o‘zlarini sezdirib qo‘yganini anglab yetgach, boltalarini, oziq-ovqat xaltalarini tashlab qochib ketdi. Xavfsizlik xodimlari havo nazoratidan va kinologiya mutaxassislaridan yordam so‘rab, qonunbuzarlardan birini qo‘lga oldi”, — dedi Janubiy Afrika milliy parklar vakili.
Qo‘lga olingan qonunbuzar bog‘ning xavfsizlik xizmati xodimlariga sheriklari bilan fillar to‘dasiga duch kelganini va sheriklari qochib, qutulgan-qutulmagani haqida bilmasligini aytib berdi.
“Keyinroq xavsizlik xizmati xodimlari yana bir gumonlanuvchining jasadini topdi. U qattiq ezg‘ilab tashlangan edi. Taxminlarga ko‘ra, olingan jarohatlar natijasida erkak voqea joyida halok bo‘lgan. Murdaning yonidan o‘qotar qurol topilgan. Uchinchi gumonlanuvchi ham qochishning uddasidan chiqqan, lekin u ham tan jarohatlari olgan. Politsiya uni qidirishda davom etadi”, — dedi milliy bog‘ vakili.
Tabiatni muhofaza qilish xalqaro kengashining ma’lumotlariga ko‘ra, bugungi kunda Afrikada, taxminan, 415 mingta fil qolgan.
Ma’lumot uchun, 2020-yilda Botsvana shimolida 350 dan ortiq fil noma’lum sabablarga ko‘ra halok bo‘lgan edi — olimlar vaziyatni ekologik falokat deb atagan. Ta’kidlanishicha, halok bo‘lgan fillarning 70 foizi suv obyektlari yaqinidan topilgan.
Fil suyagi savdosi uchun katta jarima belgilanganiga qaramay, har yili brakonyerlar minglab fillarni ularning shoxi uchun ovlaydi.
Avvalroq Rossiya tarkibiga kiruvchi Tatariston poytaxti Qozon shahridagi Davlat sirkida tomosha ko‘rsatayotgan fil sherigiga hujum qilgani haqida xabar berildi. Sirk vakilining ma’lumot berishicha, hech kim jarohatlanmagan.
Izoh (0)