AQSh sobiq prezidenti Donald Tramp Amerikaning amaldagi yetakchisi Jo Baydenning Afg‘onistondan qo‘shinlarni olib ketishni 11-sentabrgacha yakunlash rejasini tanqid qildi. Bu haqda “RBK” xabar berdi.
“Men Jo Baydenning Afg‘onistondagi qo‘shinlarimizni olib chiqish sanasi sifatida 11-sentabrdan foydalanishini umuman xohlamagan bo‘lardim”, — dedi Tramp.
Sobiq prezident tanlangan sana Amerika qo‘shinlarini olib chiqish uchun maqbul emasligining ikkita sababini aytib o‘tdi. Birinchidan, Trampning fikricha, “buni tezroq qilish mumkin va shunday qilish kerak”.
Trampning bayonotida aytilishicha, AQSh prezidenti bo‘lgan paytida u Afg‘onistonda joylashgan qo‘shinlar sonini 16 mingdan 2 mingtagacha qisqartirish va “milliard dollarlik” AQSh uskunalarini mamlakatdan olib chiqib ketish orqali qo‘shinlarni tezroq olib ketishga imkon yaratib qo‘ygan.
Trampning so‘zlariga ko‘ra, ushbu sanadan foydalanmaslikni ikkinchi sababi shundaki, AQShda 2001-yilda aynan shu sanada teraktlar sodir bo‘lgan. “11 sentabr – bu o‘ta fojiali voqealar va mamlakatimizning og‘ir davri bilan bog‘liq sana”, — deb esladi Tramp.
Jo Bayden AQSh Afg‘onistondan o‘z qo‘shinlarini 11-sentabrgacha olib chiqishi haqida rasman e’lon qilgan edi. Uning ketidan Britaniya ham harbiylarini olib ketadi.
Entoni Blinken 14-aprel kuni NATOga o‘z qo‘shinlarini Afg‘onistondan uyiga olib kelish vaqti kelganini aytgan. Blinken Baydenning qarorini shaxsan yetkazish uchun 15-aprel kuni kutilmagan tashrif bilan Afg‘oniston poytaxti Kobulga kelgan. AQShning “Tolibon” bilan tuzgan 2020-yilgi kelishuviga ko‘ra, AQSh va NATO 2021-yil 1-mayga qadar Afg‘onistondan o‘z qo‘shinlarini olib chiqishni boshlashi kerak.
AQShning Afg‘onistondagi harbiy operatsiyasi 2001-yil oktabridan beri davom etmoqda va Amerika tarixidagi eng uzoq muddatli harbiy kampaniyaga aylangan. 2010—2013-yillarda Afg‘onistondagi G‘arb kuchlari soni eng yuqori cho‘qqisiga chiqib, 150 ming kishidan oshgan. AQSh va NATOning asosiy jangovar kuchlari 2014-yilda Afg‘onistondan chiqarilgan.
Izoh (0)