Жанубий Африканинг Крюгер миллий боғида шериклари билан браконьерликда гумон қилинаётган шахс хавфсизлик хизмати ходимларидан беркинишга уриниб, филлар тўдасига дуч келди ва уларнинг аёвсиз ҳужумига учради, деб ёзмоқда Tengrinews.
Хабар берилишича, миллий боғ ҳудудини қўриқлаш пайтида хавфсизлик хизмати ходимлари уч нафар қонунбузарни пайқаб қолган ва уларни таъқиб қила бошлаган.
«Филларни ноқонуний овлашда гумон қилинаётганлар ўзларини сездириб қўйганини англаб етгач, болталарини, озиқ-овқат халталарини ташлаб қочиб кетди. Хавфсизлик ходимлари ҳаво назоратидан ва кинология мутахассисларидан ёрдам сўраб, қонунбузарлардан бирини қўлга олди», — деди Жанубий Африка миллий парклар вакили.
Қўлга олинган қонунбузар боғнинг хавфсизлик хизмати ходимларига шериклари билан филлар тўдасига дуч келганини ва шериклари қочиб, қутулган-қутулмагани ҳақида билмаслигини айтиб берди.
«Кейинроқ хавсизлик хизмати ходимлари яна бир гумонланувчининг жасадини топди. У қаттиқ эзғилаб ташланган эди. Тахминларга кўра, олинган жароҳатлар натижасида эркак воқеа жойида ҳалок бўлган. Мурданинг ёнидан ўқотар қурол топилган. Учинчи гумонланувчи ҳам қочишнинг уддасидан чиққан, лекин у ҳам тан жароҳатлари олган. Полиция уни қидиришда давом этади», — деди миллий боғ вакили.
Табиатни муҳофаза қилиш халқаро кенгашининг маълумотларига кўра, бугунги кунда Африкада, тахминан, 415 мингта фил қолган.
Маълумот учун, 2020 йилда Ботсвана шимолида 350 дан ортиқ фил номаълум сабабларга кўра ҳалок бўлган эди — олимлар вазиятни экологик фалокат деб атаган. Таъкидланишича, ҳалок бўлган филларнинг 70 фоизи сув объектлари яқинидан топилган.
Фил суяги савдоси учун катта жарима белгиланганига қарамай, ҳар йили браконьерлар минглаб филларни уларнинг шохи учун овлайди.
Аввалроқ Россия таркибига кирувчи Татаристон пойтахти Қозон шаҳридаги Давлат циркида томоша кўрсатаётган фил шеригига ҳужум қилгани ҳақида хабар берилди. Цирк вакилининг маълумот беришича, ҳеч ким жароҳатланмаган.
Изоҳ (0)