Prezident Shavkat Mirziyoyev raisligida joriy hafta xizmat ko‘rsatish sohasini rivojlantirish bo‘yicha kengaytirilgan yig‘ilish o‘tkazilishi hamda mazkur sohani to‘liq ishga solish maqsadida yangi imkoniyatlar, qulayliklar belgilanishi kutilmoqda. Bu haqda Prezident matbuot kotibi Sherzod Asadov 19-aprel, dushanba kuni o‘tkazilgan brifingda ma’lum qildi, deya xabar bermoqda “Daryo” muxbiri.
Asadovning ta’kidlashicha, hafta davomida davlat rahbari bir qator yangi xorijiy elchilar, xususan, Bangladesh, Chexiya, Misr, Iordaniya, Turkiya, Yevropa Ittifoqi va Rossiya Federatsiyasi elchilari — Muhammad Jahongir A’lam, Vaslav Yilek, Amira Faxmi, Demiya Zuhayr Xaddad, Olgan Bekar, Sharlotta Adrian va Oleg Malginovdan ishonch yorliqlarini qabul qiladi.
“Bo‘lajak marosim yangi elchilarning yurtimizdagi faoliyatini rasman boshlab beradi. Shuningdek, shu hafta Prezident ishtirokida oyning oxirigacha tashkil etiladigan bir qator ikki tomonlama va yirik xalqaro tadbirlarga tayyorgarlik ko‘riladi”, — dedi Sherzod Asadov.
Izoh (0)