Buxoroda 102 yoshli Ikkinchi jahon urushi qatnashchisining ta’mirtalab uyi qator murojaatlarga qaramay, e’tiborsiz qolib kelmoqda

Buxoroda Ikkinchi jahon urushi qatnashchisi 102 yoshli Ahmad G‘ulomovning xonadoni hokimlikka qilingan qator murojaatlarga qaramay, ta’mirlanmasdan kelmoqda, deb xabar beradi “Xalq so‘zi Online”.

Ahmad G‘ulomov 1939-yilda armiyaga ketgan va Finlyandiya bilan kechgan urushda qatnashgan. Fashistlar Germaniyasiga qarshi ayovsiz janglarda ishtirok etgan. Yapon urushi qatnashchisi bo‘lgan. Yetti yildan so‘ng, 1946-yilda O‘zbekistonga sog‘-omon qaytib kelgan.

Hozirda Ahmad G‘ulomov o‘g‘lining oilasi bilan bir hovlida yashaydi. “Hammom va hojatxona hovlining chekkasida joylashgan. Har kecha zarurat yuzasidan 3-4 marta chiqishimga to‘g‘ri keladi. Qiynalaman. Yashab turgan uyimning ahvolini esa ko‘rib turibsiz. O‘g‘lim ham pensioner. Nafaqaga yashaydi. Bu uyni qaytadan qurishga qurbi yetmaydi”, — deydi urush faxriysi.

Mazkur uy XX asrning 50- yillarida xom g‘ishtdan tiklangan. Yillar o‘tib, uy poydevori yo‘l (ko‘cha)dan chamasi bir-bir yarim metrcha pastda qolgan. Zax, devorlar nuragan, chakki o‘tadi. Hatto ikki-uch yilcha muqaddam uyga yondosh dahlizning bolori singan. U hali-hanuz shundoqligicha turibdi.

Ta’kidlanishicha, oila ushbu masalalarda shahar hokimligiga bir necha bor murojaat qilgan.

“Viloyatimiz rahbari, rahmatli O‘ktam Barnoyev bayram munosabati bilan uyimizga kelganlarida mas’ullarga tegishli topshiriqlarni berdi. Hatto qo‘shnimizning mana bu holatdagi hovlisini ko‘rib, bu oilaga ham ko‘maklashish kerakligini aytdi. Bilasiz, bayram bahonasida uyimizga katta-kichik mehmonlar keladi. Sizga yolg‘on, bizga chin, har yil 9-may arafasida qo‘shni hovlidagi yong‘in asoratlari ko‘rinmasin, deb bu yerni ko‘cha tomondan to‘sib qo‘yishadi”, — deydi Mahmud G‘ulomov.

Ma’lum bo‘lishicha, Mahmud G‘ulomov nazarda tutgan qo‘shni hovlida ham Ikkinchi jahon urushi qatnashchisi yashagan. U vafot etgach, nima sababdandir bu uyda yong‘in sodir bo‘lgan. Yong‘in bir amallab o‘chirilgan. Ammo oradan uch-to‘rt yil o‘tsa-da “asorati” shundoq turibdi. Aytishlaricha, uyni buzib qayta qurishga oilaning qo‘li kaltalik qiladi.

Nashr Buxoro shahar hokimi o‘rinbosari O‘tkir Jumayevning (hozirda u shahar hokimi) Tursunoy ko‘chasi 12-uyda yashovchi Ikkinchi jahon urushi qatnashchisi Ahmad G‘ulomov nomidan yuborgan murojaatiga 2020-yilning 28-fevralida yo‘llagan javob xatini keltirgan.

Sizning yoshingiz 101 da ekanligi, pensioner o‘g‘lingiz hovlisida istiqomat qilib kelayotganingiz, uy-joydagi hojatxona uzoqroqda joylashgani sababli qiynalayotganingiz bois sharoitlar yaratib berishni so‘rab yozgan arizangiz shahar hokimligi tomonidan o‘rganib chiqilib, sizning Ulug‘ Vatan urushi qatnashchisi ekaningiz, ulug‘ yoshda —101 yoshga kirganingiz, shuningdek, yashab kelayotgan sharoitingizni inobatga olib, uy-joyingizga sharoit yaratib berishni so‘rab yozgan arizangizni o‘rganib chiqilib, quyidagilarni bildiramiz.

Arizangiz tegishli soha mutaxassislari tomonidan uydagi sharoitlar joyida o‘rganib chiqildi. Sizning yoshingiz va uydagi sharoitlardan kelib chiqib homiy tashkilot aniqlangani (20-trestiga qarashli ART Prof bilding MChJ) va 2020-yilning aprel oyida amaliy yordam berish rejalashtirilganini ma’lum qilamiz.

Siz mazkur arizangiz bo‘yicha olingan javobdan qoniqmagan taqdirda, yuqori turuvchi hokimlik yoki sud organlariga murojaat qilishingiz mumkinligini bildiramiz.

2020-yilning 23-sentabri sanasi bilan kelgan javob xatida shahar hokimi o‘rinbosari S. Sharipov “Uyingizni ta’mirlab berish maqsadida quruvchi homiy tashkilot tanlanmoqda. Tashabbuskor homiy tashkilot homiylik tashabbusini bildirganida uyingizni ta’mirlash uchun qurilish materiallari olib berilishini bildiramiz”, — deb yozgan.

Biroq “tanlov” cho‘zilib ketgan. Kutaverib toqati toq bo‘lgan urush qatnashchisi yaqinda yana bir bor shahar hokimiga yozma murojaat qilgan. Javob ham kelgan. S.Sharipov imzosi bilan yo‘llangan xatda ariza joyida o‘rganilgani, homiy tashkilot aniqlanganidan so‘ng 2021-yilning may—iyun oylarida uy ta’miriga amaliy yordam berilishi aytilgan.

“Murojaatga jo‘yali bir javob olarmikanmiz, deb shahar hokimiga uchrashdik. Hokim qurilish bo‘yicha mas’ullardan biri Sobirov Azimga ‘Bu otaxonning masalasini birinchi navbatda hal etinglar’, deya topshiriq berdi. U esa ‘Buning uchun qurilish firmasi topishimiz’ kerak qabilidagi vajlarni ro‘kach qildi. Aldaydi. Bu ham kamlik qilganiday, ‘Nabiralar, abiralar bor, boboga bir qaranglar-da’ deganini aytmaysizmi? Qornimgamas, qadrimga yig‘layman, deganlari shu bo‘lsa kerak-da. Axir, Ikkinchi jahon urushi qatnashchilari oramizda juda kam qoldi. Ularni har qancha e’zozlasak arziydi”, — deydi otaxonning jiyani, 65 yoshli Rauf Narziyev.

Ma’lumot uchun, Ikkinchi jahon urushiga Buxorodan 73 688 nafar kishi jo‘nab ketgan. Ularning 30 ming nafardan ziyodrog‘i omon qaytgan.