Qashqadaryo viloyati hokimi Zoir Mirzayev “Daryo” muxbiri va IIB mansabdori o‘rtasida yuzaga kelgan holatga munosabat bildirib, vaziyat shaxsan nazoratida ekanligini bildirdi. Bu haqda hokim bilan telefon orqali muloqot qilgan “Daryo” muxbiri xabar berdi.
Ta’kidlanishicha, Zoir Mirzayev “Daryo” muxbiri Otabek Qo‘ldoshev bilan telefon orqali muloqot qilgan.
“Xizmat faoliyati davomida IIB xodimlarining chegaradan chiqish holati uchrab turadi. Qashqadaryoda esa bunday vaziyat ikki karra ko‘proq. Bu voqeadan xabar topganimdan keyin viloyat IIB boshlig‘i bilan ham bog‘landim. Va aybdorga nisbatan qonuniy chora ko‘rilishi lozimligini aytdim. Bu ish shaxsan nazoratimda, aybdorga, albatta, qonuniy chora ko‘riladi”, — degan viloyat hokimi sayt muxbiri bilan muloqotida.
Eslatib o‘tamiz, 2021-yilning 16-aprel kuni Ramazon oyining ilk jumasidan fotoreportaj tayyorlashga kirishgan “Daryo” muxbiri Qarshi shahridagi Ko‘k gumbaz jome masjidida o‘zini Azamat Shaymardonov deya tanishtirgan IIB mansabdori qarshiligiga uchragan. IIB mas’uli “Daryo” muxbirining professional faoliyatiga to‘sqinlik qilgani yetmagandek, uning ish qurolini ham zo‘rlik bilan tortib olgan. Va qo‘l ostidagi xodimlarga jurnalistni olib borib tiqishni buyurgan. Topshiriqni olgan IIB xodimlari esa jurnalistni jinoyatda gumonlanuvchilarni tashuvchi maxsus avtomobilda yarim soat “sayr qildirib”, axiri Qarshi shahar IIB 1-sonli ichki ishlar bo‘limiga olib borgan.
Ushbu voqeadan so‘ng “Daryo” tahririyati zudlik bilan IIV matbuot kotibi Shohrux G‘iyosov bilan bog‘landi. Shuningdek, Qarshi shahar 1-sonli IIB binosi oldiga qashqadaryolik bir guruh jurnalist va blogerlar to‘plangan. Ko‘p o‘tmay 1-sonli IIBga Qarshi shahar IIB boshlig‘i B.Mirzayev va viloyat IIB axborot xizmati rahbari Iroda Rasulova ham yetib kelgan.Yuzaga kelgan vaziyat yuzasidan Ichki ishlar vazirligi matbuot xizmati bayonot berib, “Qarshi shahrida ‘Daryo’ internet-nashri muxbiri Otabek Qo‘ldoshev bilan suhbat jarayonida kasb etikasini buzgan ichki ishlar organi xodimining harakatlari o‘rganib chiqilib, huquqiy baho beriladi”, dedi.
Mazkur voqeaga munosabat bildirgan AOKA esa “Bu kabi holatlar davlat siyosatiga zid” ekanligini eslatib, Agentlik o‘z vakolati doirasida Ichki ishlar vazirligiga so‘rov yuborganini hamda Ichki ishlar vazirligi amaldagi qonunchilik normalarini chetlab o‘tgan xodimning xatti-harakatlariga munosib baho berishidan umidvorligini bildirdi.
Mavzuga doir:
- IIV Andijonda IIB xodimlari qiynoqlaridan vafot etgan fuqaro ishi yuzasidan uzr so‘radi
- “Andijondagi voqea huquqni muhofaza qilish organlari tizimini tubdan isloh qilish lozimligini ko‘rsatdi”. “Yuksalish” umummilliy harakati hodisaga munosabat bildirdi
- “‘Uchastkavoy’laringni qutqarib qolsalaring, urgani yo‘q desalaring, rozi qiladi”. Chiroqchilik IIB xodimlari qotillikni yashirish uchun guvohlarning og‘zini yopishga uringan
- IIV matbuot kotibi: IIB binosida odam o‘limi — yangilik emas
Izoh (0)