O‘zbekiston va Xitoy ZF-UZ-VAC2001 vaksinasi koronavirusning yangi “britancha” va “braziliyacha” shtammlariga qarshi samarali ekani tasdiqlandi, deb xabar bermoqda Innovatsion rivojlanish vazirligi matbuot xizmati.
Bundan tashqari, 2021-yil fevral oyida o‘tkazilgan sinovlar doirasida laboratoriya namunalari natijalariga ko‘ra, vaksina koronavirusning “janubiy afrika” shtammiga qarshi aktiv neytral holatini saqlab qolgani qayd etilgan.
“Tadqiqotlarning uchinchi bosqichi natijalariga ko‘ra, vaksina yuqori samaradorlikni va yuqori darajadagi antitanalar ishlab chiqilishini ko‘rsatdi. <...> Nazorat guruhiga kiritilgan 150 nafar ko‘ngillilarning 90 foizida ikkinchi dozadan so‘ng qonda 4,55 Au/ml dan yuqori bo‘lgan antitanalar darajasi aniqlandi, bu koronavirusni zararsizlantirish uchun yetarli hisoblanadi”, — deyiladi xabarda.
Ta’kidlanishicha, O‘zbekistondagi klinik tadqiqotlar xalqaro klinik amaliyotda qo‘llaniladigan huquqiy va axloqiy me’yorlarga muvofiq GSR (Good Clinical Practice — Tegishli klinik amaliyot) qoidalarini hisobga olgan holda o‘tkazildi.
Respublikada koronavirusga qarshi Xitoyning Anhui Zhifei Longcom kompaniyasi vaksinasinig uchinchi bosqichi sinovlari 2020-yil 10-dekabrda boshlangandi. Keyinchalik kompaniya O‘zbekistonni ZF-UZ-VAC 2001 deb nom olgan vaksinani ishlab chiqishda hammuallifi sifatida tan oldi. 1-mart kuni O‘zbekistonda ushbu vaksinasi foydalanish uchun ro‘yxatdan o‘tkazildi. 27-mart kuni ZF-UZ-VAC2001 vaksinasining 1 million dozasi Xitoydan O‘zbekistonga olib kelindi. Aprel oxiriga qadar yana 1 million dona Xitoy vaksinasi olib kelinishi ma’lum qilingan.
Mavzuga doir:
Izoh (0)