Oliy Majlisning Inson huquqlari bo‘yicha vakili (ombudsman) o‘rinbosari – Bola huquqlari bo‘yicha vakili Aliya Yunusova 12—15-aprel kunlari Surxondaryo va Qashqadaryo viloyatlarida xizmat safarida bo‘lib qaytdi.
Xizmat safari davomida Bola huquqlari bo‘yicha vakil Bolalar uyi va Mehribonlik uylarida yetim bolalar va ota-onasining qaramog‘idan mahrum bo‘lgan bolalar uchun yaratilgan sharoitlar, tarbiyalanuvchilarning tibbiy ko‘rikdan o‘tishi, sog‘lomlashtirish, sog‘lom ovqatlantirish holatlari, bolalarni oilalarga qaytarish jarayoni, muassasa bitiruvchilarining bandligi, jamiyatga ijtimoiy moslashuvini ta’minlash, bolalarni ijtimoiy qo‘llab-quvvatlash bo‘yicha amalga oshirilgan ishlar holati, muammo va takliflarni o‘rgangan.
O‘rganishlar Qashqadaryo viloyati Kitob tumanida joylashgan 5-Mehribonlik uyida davom ettirilgan. O‘rganish kuni muassasada 65 nafar (qizlar 28 nafar) tarbiyalanuvchilar bo‘lib, ularning 15 nafarini chin yetimlar tashkil etadi.
Tibbiyot xonasi, stomotolog xonasi, bemorlarning alohidalash xonalarining tagi beton qoplamali bo‘lib, zahkash. Bolalarning bo‘sh vaqtini o‘tkazish uchun yetarli sharoitlar mavjud emas. Mebellar eski.
Sog‘lom ovqatlantirish holatlarini o‘rganish davomida Bola huquqlari bo‘yicha vakil e’tiborini tarbiyalanuvchilarning birinchi ovqatni umuman yemasdan chiqqani va deyarli ikkinchi ovqatni ham yemagani diqqatini tortgan. Birinchi ovqatga karam sho‘rvasi qilingan bo‘lib, u o‘ta yog‘li va o‘ziga xos hidi bo‘lgan.
Bolalarga tushlikda sharbatlar berilmagan. Holat yuzasidan mahsulotlar sifatini ko‘rish uchun oziq-ovqat omboriga tashrif buyurilganida mahsulotlar sifati buzilgani, karam, rediska, kartoshka va noklarning chirib qolgani, go‘sht rangining o‘zgargani, ko‘plab yog‘lari borligi aniqlangan. Shuningdek, go‘sht mahsulotlarini tortib ko‘rish so‘ralganda tarozi yo‘qligi, oshxonaning sanitariya holati yaxshi emasligi, idishlar yetishmasligi, bolalarga alyuminiy krujkalarda choy berilayotgani, krujkalarning ushlashga esa quloqlari yo‘qligi, bu bolalar sog‘ligi uchun xavf tug‘dirishi va yana bir qator kamchiliklar mavjudligi ma’lum bo‘lgan.
Holatni chuqur o‘rganish uchun tuman prokuraturasidan vakil chaqirilgan va mavjud kamchiliklarni bartaraf qilish yuzasidan mutasaddilarga majburiy ko‘rsatmalar berilgan.
Izoh (0)