O‘zbekiston moliya vazirining o‘rinbosari Odilbek Isoqov va Yaponiyaning O‘zbekistondagi elchisi 16-aprel kuni Yoshinori Fujiyama rivojlanish siyosatini qo‘llab-quvvatlash dasturini amalga oshirish uchun 195 mln dollarlik kelishuv notalarini imzoladi. Bu haqda Yaponiya elchixonasiga tayanib, “Gazeta.uz” xabar berdi.
O‘zbekiston hukumatini moliyaviy qo‘llab-quvvatlashga yo‘naltirilgan kredit mamlakatning elektr energiyasi sohasidagi siyosiy muammolarni hal qilish va ijtimoiy-iqtisodiy tiklanish hamda barqarorlashuviga hissa qo‘shishga qaratilgan. Ushbu kredit Yaponiya tomonidan AQSh dollarida O‘zbekistonga taqdim etilgan birinchi kredit bo‘ldi.
“O‘zbekistonda iqtisodiy o‘sish bilan bir qatorda elektr energiyasiga bo‘lgan talab tobora ortib bormoqda, shu munosabat bilan mamlakatda elektr energiyasini boshqarish, aniq statistik ma’lumotlar, xalqaro buxgalteriya hisobi standartlariga asoslangan moliyaviy menejment va elektr stansiyalarini ekspluatatsiya qilish, shuningdek, texnik xizmat ko‘rsatishni kuchaytirish kabi vazifalar muhim bo‘lib turibdi”, — deya ta’kidlandi elchixonada.
Kredit 25 yilga, Libor (olti oy) stavkasi bo‘yicha 7 yillik imtiyozli davr bilan yillik 1,1 foiz miqdorida ajratildi.
Bundan avval Yaponiya O‘zbekistonga 136,5 mln dollar miqdorida favqulodda kredit ajratgani, O‘zbekistonda gaz uzatish tizimini modernizatsiya qilish uchun 618 mln dollargacha kredit jalb etilishi mumkinligi hamda Jahon banki O‘zbekistondagi islohotlarni qo‘llab-quvvatlashga 500 mln dollar ajratilgani haqida xabar berilgandi.
Izoh (0)