Surxondaryo viloyatida daraxtdan dovuchcha (g‘o‘ra) olayotgan 13 yoshli bolani 46 yoshli erkak pichoqlab qo‘ydi, deya xabar bermoqda Tergov departamenti.
Ma’lum qilinishicha, 2021-yilning 12-aprel kuni soat 19:45 larda fuqaro 46 yoshli Sh.U. Termiz shahar “Kokildor ota” mahallasida joylashgan yashash uyi yonida voyaga yetmagan 13 yoshli T.A. o‘ziga tegishli bo‘lmagan o‘rik daraxtidagi dovuchcha (g‘o‘ra)larni olayotganligini ko‘rib, unga ketishini aytib haydagan va janjal vaqtida pichoq bilan voyaga yetmagan T.A.ning qorin sohasiga bir marotaba urib, jarohat yetkazgan.
Sud tibbiy ekspertiza xulosasida T.A. hayot uchun xavfli bo‘lgan og‘ir tan jarohatlar olganligi ko‘rsatilgan.
Mazkur holat yuzasidan Termiz shahri bo‘yicha IIO FMB huzuridagi Tergov bo‘limi tomonidan Sh.U.ga nisbatan Jinoyat kodeksining 104-moddasi 2-qismi “l” bandi (qasddan badanga og‘ir shikast yetkazish) bilan jinoyat ishi qo‘zg‘atilib, protsessual tartibda ushlangan.
Hozirda tergov davom etmoqda.
Bundan avval Toshkentda “havo sharlari” sotuvchilari o‘rtasida kelib chiqqan janjal oqibatida bir kishi pichoqlangani, Farg‘onada bog‘cha bolalarini tinchlantirish uchun temir qoshiqdan foydalanib, 4 yoshli bolaning bir ko‘zidan ayrilishiga sababchi bo‘lgan tarbiyachiga sud hukmi o‘qilgani hamda Andijonda 68 yoshli erkak do‘sti bilan janjallashib, uni pichoqlab o‘ldirgani haqida xabar berilgandi.
Izoh (0)