O‘zbekiston Respublikasi olimlari tomonidan yaratilayotgan ikki vaksina – Innovatsion rivojlanish vazirligi huzuridagi Ilg‘or texnologiyalar markazining koronavirus S oqsili asosidagi rekombinant vaksinasi hamda Fanlar akademiyasining Genomika va bioinformatika markazining SARS-CoV-2 oqsil bo‘lagining uch sohasi: pcDNA3 1 (+) plazmidasiga qo‘yilgan NTD, RBD va HR1-HR2 vaksinasi Jahon sog‘liqni saqlash tashkilotining nomzod vaksinalar ro‘yxatiga kiritildi. Bu haqda “Daryo”ga Innovatsion rivojlanish vazirligi xabar berdi.
Hozirda mazkur ikki vaksina klinik oldi sinovlardan o‘tmoqda.
JSSTning ma’lumotlar bazasi COVID-19 vaksinasiga qarshi nomzod-vaksinalar to‘g‘risida to‘liq ma’lumotlarni yig‘ib boradi. Mazkur baza muntazam ravishda, haftasiga ikki marta yangilanadi. Unda COVID-19’ga qarshi nomzod-vaksinalarning klinik va klinik oldi jadvali keltirilgan bo‘lib, nomzod-vaksinalarni tahlil qilish imkoniyatini beradi.
Har bir vaksinaning 1-faza, 2-faza va 3-faza sinovlari kuzatiladi. Vaksinalarning xavfsizligi va samaradorligi to‘g‘risidagi ilmiy maqolalarga havolalar beriladi. Shuningdek, bu baza har bir nomzod-vaksinaning asosiy xususiyatlari to‘g‘risidagi ma’lumotlarni o‘z ichiga oladi.
O‘z navbatida mazkur platforma orqali COVID-19 qarshi yaratilayotgan vaksinalar turli kriteriylar, xususan vaksina platformasi, vaksinatsiya grafigi, qo‘llash usuli, ishlab chiqaruvchisi, sinov fazasi, klinik natijalar bo‘yicha tasniflangan.
Bundan avval O‘zbekistonda koronavirusga qarshi emlanganlar soni 370 mingga yaqinlashgani, O‘zbekistonda koronavirusga qarshi emlanganlarga onlayn-ma’lumotnomalarni berish boshlangani hamda O‘zbekistonda hayvonlar uchun COVID-19 vaksinasi sinovdan o‘tkazilishi haqida xabar berilgandi.
Izoh (0)