Qurilish vaziri Botir Zokirov: “Trest-12” kompaniyasiga men yoki oilamning umuman aloqasi yo‘q

Qurilish vaziri Botir Zokirov Samarqandda o‘tkazilgan matbuot anjumanida aksiyadorlari orasida uning o‘g‘li va turmush o‘rtog‘i bo‘lgan “Trest-12” kompaniyasi bir nechta davlat xaridlarini tendersiz qo‘lga kiritgani haqidagi xabarlarga o‘z munosabatini bildirdi. Bu haqda “Daryo” muxbiri Farhod Norbo‘tayev xabar bermoqda.

Qurilish vazirining ta’kidlashicha, “Trest-12” kompaniyasi uzoq yillik tarixga ega bo‘lib, bunday tashkilot respublikada kam sonli hisoblanadi.

Men o‘zim bu tashkilotda 20 yildan ortiq vaqt davomida ishlaganman. Bu yerda mening yaqinlarim, ustozlarim, 8-10 nafar sinfdoshlarim ham ishlagan. Bizda bitta tartib bor, ish vaqtida qarindoshchilik, tanish-bilishchilik degan gap yo‘q. Hamma narsa qat’iyat bilan olib boriladi. Ish ish bilan. Do‘stlik, qarindoshchilikning o‘z joyi bor. Boshqachasiga ish yuritib bo‘lmaydi. Men hozir bu tashkilotda ishlamayman. Adashmasam, 11 yil bo‘ldi. Bugun ko‘pchilik savol bermoqda. Nega bu tashkilot tendersiz qurilishlarni yutib olmoqda? Men bitta narsani aytishim kerak, tashkilotning 51 foiz aksiyasi davlat ulushi hisoblanadi va tashkilot to‘liq davlat boshqaruvida. Men yoki mening oilamning umuman aloqasi yo‘q.

Botir Zokirov, qurilish vaziri

Botir Zokirov kompaniyaga Oliy Majlis binosini rekonstruksiya qilish uchun tendersiz 16,54 milliard so‘m ajratilganiga ham to‘xtalib, bu ishlarga o‘zining aloqasi yo‘qligini ma’lum qildi. Uning so‘zlariga ko‘ra, korxona uzoq yillardan buyon katta ma’muriy binolarni qurib, ta’mirlab kelgan.

Nimaga aynan ‘Trest-12’ mana shunaqa binolarni qurish yoki ta’mirlash ishlarini tendersiz yutib oladi? Sababi bunaqangi binolarni quradigan yoki ta’mirlaydigan tashkilotlarning o‘zi juda ham kam. Shu vaqtga qadar bu tashkilot ta’mirlagan birorta obyektda sifatsiz yoki talabga javob bermagan, degan holat bo‘lmagan. Bu tashkilot zararga bo‘lsa ham, obyektning qurilishini oxiriga yetkazadi. Bu tashkilot uzoq yillar o‘zi to‘plagan imijiga putur yetkazgisi kelmaydi. 12-trestning o‘z konsepsiyasi bor. Istasangiz, o‘sha tashkilotning o‘zida ham matbuot anjumani tashkil qilib beraman. O‘sha yerda muhitni ko‘rib, kimlar ishlayotganiga guvoh bo‘lasiz.

Botir Zokirov, qurilish vaziri

Vazirning ta’kidlashicha, “Trest-12” kompaniyasiga ayrim obyektlarning to‘g‘ridan to‘g‘ri berilishining sabablari bor. Tashkilotning tarixi, ishidagi sifati va yaxshi kadrlari bor. Shuningdek, korxonaning o‘ziga yarasha qonun-qoidalari bor.

Tushunarli bo‘lishi uchun bitta narsa aytib o‘tmoqchiman, 1999-yilda Toshkentda terakt bo‘lgandan keyin bir soat o‘tib ‘Trest-12’ xodimlari ta’mirlash ishlarini boshlab yuborgan. Xuddi shuningdek, Bosh prokuraturada sodir bo‘lgan teraktdan so‘ng ham ta’mirlash ishlarini ular olib borgan. Mana shuning o‘zi ham ijtimoiy tarmoqlarda tarqalayotgan savollarga javob bo‘ladi. Mening o‘zimning esimda turibdi. O‘sha Bosh prokuraturada bo‘lgan teraktdan so‘ng butun binoni yopib qo‘yib, kechasi bilan ishlagan xodimlar. Devorlardan odamlarning qoldiqlarini olishgan.

Tashkilot 1999-yilgi teraktdan so‘ng 22 qavatli binoning 6 qavatini ‘kesib tashlagan’. Bu tashkilotning texnologiyasi yaxshi. Men o‘shanda ko‘rganman, 70-80 santimetrli devorni hech qanday qiyinchiliksiz kesib tashlash mumkinligini.

Botir Zokirov, qurilish vaziri

Botir Zokirov “Trest-12” Senatning binosini qurgani, yaqinda Vazirlar Mahkamasini ikkinchi marotaba rekonstruksiya qilganini ham qo‘shimcha qildi. U “Trest-12”ga tushayotgan buyurtmalarning unga issiq-sovug‘i yo‘qligini ta’kidladi.

Trestga tushayotgan binolar masalasini men hal qilmayman. Buni hal qiladigan o‘zining buyurtmachilari bor. 51 foiz davlat ulushi bo‘lganidan so‘ng menga buning sovug‘i ham, issig‘i ham yo‘q. Men o‘zimga ep bilmayman bu ishlarga aralashishni. Bu masalada menda hech qanday qiziqish yo‘q. Davlat 51 foizini sotadigan bo‘lsa, menda qiziqish bo‘ladi. O‘shanda men vazir bo‘lib ishlashim mumkin bo‘lmay qoladi. Shunaqa bo‘ladigan bo‘lsa, men ariza yozib ketaman. Chunki mening boshqa ilojim yo‘q. Men u tashkilotda ishlayotgan odamlarga sen ishdan bo‘shab ket, deb aytolmayman. Undan ko‘ra o‘zim bo‘shab ketaman.

Botir Zokirov, qurilish vaziri

Avvalroq Toshkentning Sharof Rashidov ko‘chasidagi (Mustaqillik maydoni yonida) ma’muriy bino rekonstruksiyasi va favvora ostiga avtoturargoh qurilishiga 431,5 milliard so‘m sarflanishi mumkinligi ma’lum bo‘lgandi. Ushbu loyiha pudratchisi sifatida “Trest-12” AJ tanlangan. Xuddi shu kompaniya Oliy Majlis Qonunchilik palatasi binosini joriy ta’mirlash hamda fasad qismini rekonstruksiya qilish bo‘yicha 16,5 milliard so‘mlik davlat xaridini tendersiz qo‘lga kiritgan edi.

“Trest-12”, shuningdek, Toshkentdagi Islom sivilizatsiyasi markazini qurish bo‘yicha 988,2 milliard so‘mlik loyihaga ham tender savdolarisiz ega chiqqan edi. Shuningdek, “Trest-12” tender tanlovlarisiz Toshkentda 988,2 milliard so‘mlik Islom sivilizatsiyasi markazining qurilish loyihachisi bosh pudratchiga aylangan.

Hozirda Korrupsiyaga qarshi kurashish agentligi “Trest-12” bilan bog‘liq davlat xaridlarini o‘rganmoqda.