Tashqi mehnat migratsiyasi agentligi Rossiyadagi O‘zbekiston fuqarolarini 15-iyulga qadar o‘z maqomlarini qonuniylashtirishga chaqirdi

Rossiya Ichki ishlar vazirligi mamlakatdagi O‘zbekiston hamda boshqa MDH davlatlaridan kelgan noqonuniy migrantlardan 15-iyunga qadar mamlakatni tark etishni talab qilgani haqida xabar berilgandi. Tashqi mehnat migratsiyasi agentligi Rossiya hududida noqonuniy ravishda ishlab kelayotgan O‘zbekiston fuqarolarini maqomlarini qonuniylashtirishga chaqirdi.

Qayd etilishicha, 2020-yil 18-aprelda Rossiya prezidentining “Yangi koronavirus (COVID-19) infeksiyasining tarqalishi xavfi tufayli chet el fuqarolari va fuqaroligi bo‘lmagan shaxslarning Rossiya Federatsiyasida huquqiy maqomini belgilash bo‘yicha vaqtinchalik chora-tadbirlar to‘g‘risida”gi farmoni qabul qilingan.

Ushbu farmon doirasida Rossiya Ichki ishlar vazirligi hamda O‘zbekistonning Rossiyadagi diplomatik vakolatxonalari hamkorligida 2020-yilda Rossiya hududida vaqtincha mehnat faoliyatini amalga oshirayotgan 50 ming 700 nafar fuqarolarning maqomi qonuniylashtirildi.

Hozirgi kunda ushbu farmonga kiritilgan o‘zgartirishlar asosida Rossiya hududida noqonuniy bo‘lib turgan xorijiy davlat fuqarolariga 2021-yil 15-iyunga qadar o‘z maqomlarini qonuniylashtirishga ruxsat berildi. Bu haqda Tashqi mehnat migratsiyasi agentligi xabar bermoqda.

Shunga ko‘ra, Rossiya Ichki ishlar vazirligi bilan o‘rnatilgan hamkorlik asosida Rossiya hududida huquqiy maqomi qonuniylashtirilishi kerak bo‘lgan 300 ming nafardan ortiq O‘zbekiston fuqarolarining ro‘yxati shakllantirildi.

Ushbu ro‘yxatdagi fuqarolarning O‘zbekistondagi manzillari bo‘yicha mahallabay o‘rganishlar asosida uyma-uy yurib fuqarolarning oila a’zolariga Rossiya prezidentining yuqoridagi farmonining mazmun-mohiyati to‘g‘risida tushuntirishlar berib borilmoqda.

Hozirgi kunda ushbu tushuntirish ishlari doirasida 200 ming nafardan ortiq fuqarolar qamrab olindi. Bu tadbirlar davom ettirilmoqda.

Migratsiya agentligi Rossiya hududida noqonuniy ravishda bo‘lib turgan O‘zbekiston fuqarolari 2021-yilning 15-iyuniga qadar yashash joyidagi tegishli Rossiyaning ichki ishlar organlariga murojaat qilish orqali Rossiya hududida bo‘lishlarini qonuniylashtirish huquqidan foydalanishga chaqirdi.

Bunda Rossiyaning ichki ishlar organlari tomonidan noqonuniy ravishda bo‘lib turgan O‘zbekiston fuqarolariga nisbatan mamlakatdan ma’muriy chiqarib yuborish, deportatsiya qilish chorlari qo‘llanilmaydi hamda ularga yashash joyidagi migratsiya bo‘limidan qayta ro‘yxatdan o‘tish imkoniyati beriladi.

Ushbu masalada yordam berish maqsadida O‘zbekistonning Moskva shahridagi elchixonasi va Rossiya mintaqalaridagi Bosh konsulxonalariga hamda Tashqi mehnat migratsiyasi agentligining quyidagi telefon raqamlari orqali murojaat qilish mumkin: