Piter Hyuistra: “Eyr Fors”ni mag‘lub etib, imkoniyatimizni yaxshilab olishni xohlaymiz

Osiyo Chempionlar Ligasi 2-turi doirasidagi “Eyr Fors” — “Paxtakor” o‘yinidan oldin matbuot anjumani o‘tkazildi. Unda “sherlar” bosh murabbiyi Piter Hyuistra va jamoa himoyachisi Anzur Ismoilov ishtirok etdi.

“Eyr Fors” bilan bellashuvga yaxshi hozirlik ko‘ryapmiz. O‘yin qiziqarli bo‘ladi deb o‘ylayman. Raqibimiz yaxshi jamoa, yuqori saviyadagi futbolchilari bor. “Sharja”ga qarshi o‘yinda ular juda yaxshi taassurot qoldirdi. Keyingi bosqichga chiqish uchun bu bahsdagi g‘alaba imkoniyatimizni yaxshilaydi.

Ikki yil oldin “Eyr Fors” bilan pley-off bosqichida o‘ynagandik. Bu jamoa safida ba’zi o‘zgarishlar bo‘lgan. Jamoada qolgan futbolchilari ham bor. O‘shanda bir uchrashuvdan iborat to‘qnashuv edi. Bor kuchni o‘sha o‘yinga tashlash mumkin edi. Hozir esa boshqacha holat. Guruhda jami olti bellashuv o‘ynaladi.

Zaxiradan tushirilgan futbolchilar foydali o‘ynagani juda yaxshi. Bizda bahsni o‘zgartirish uchun imkoniyat bo‘lishi quvonarli. Toshkentdagi salqinroq havodan keyin bu yerda issiq havoda futbol o‘ynayapmiz. Bunday sharoitda besh almashtirish imkoniyatiga ega bo‘lish yoqimli. Qaysi futbolchilar boshlang‘ich tarkibda tushishini keyinroq hal qilaman.

Piter Hyuistra, “Paxtakor” bosh murabbiyi

Shuningdek, Ismoilov ham o‘yin haqidagi fikrlari bilan o‘rtoqlashdi.

Biz o‘yinga jiddiy hozirlik ko‘rmoqdamiz. Bu uchrashuvda o‘zimiz xohlagandek hujumkor futbol ko‘rsatib, g‘alabaga erishishni istaymiz. Raqib kuchli, ularni hurmat qilamiz. Ammo yigitlar bilan yutuq orqali imkoniyatimizni yaxshilab, muxlislarni xursand qilishga urinamiz.

Musobaqada ko‘plab o‘yinlar o‘tkazganman. Navbatdagi o‘yinlar uchun jamoaviy birdam bo‘lib, mashg‘ulotlarda ter to‘kishda davom etib, jipslashgan holda harakat qilishimiz kerak. O‘zimizga ishonib, bir-birimizni qo‘llab quvvatlashimiz zarur.

Anzur Ismoilov, “Paxtakor” himoyachisi