Yevrokomissiya rahbari koronavirusga qarshi emlandi. Germaniya kansleri ham vaksina olishi kutilmoqda

Yevropa komissiyasi raisi Ursula fon der Lyayyen koronavirusga qarshi vaksinaning birinchi dozasi bilan emlandi. Bu haqda u o‘zining Twitter sahifasda ma’lum qildi, deb yozmoqda “Korrespondent.net”.

“Bugun koronavirusga qarshi vaksinaning birinchi dozasini olganimdan juda xursandman. Yevropa Ittifoqida vaksinatsiya va uning ta’minoti jadallashmoqda. Yevroittifoqga vaksina yetkazib berish tezlashgani sababli vaksinatsiya darajasi oshib boraveradi”, — deb yozgan u.

Siyosatchi qanday vaksina bilan emlanganiga aniqlik kirtmadi. Lekin hozir Belgiyada Pfizer va AstraZeneca vaksinalaridan foydalanilmoqda, oddiy aholi o‘zi emlanadigan vaksinani tanlash huquqiga ega emas.

Shuningdek, Germaniya kansleri Angela Merkelning ham 16-aprel kuni koronavirusga qarshi AstraZeneca vaksinasining birinchi dozasi bilan emanishi ma’lum bo‘ldi. Yoshi bo‘yicha kansler Germaniyada ushbu preparat bilan emlanishga ruxsat etilgan guruhga mansub hisoblanadi.

Bir necha kun oldin Merkelning matbuot kotibi Shteffen Zaybert kanslerning tez orada emlanishi haqida xabar bergan edi. Keyinroq 11-aprelga belgilangan vaksinatsiya bekor qilingani ma’lum bo‘ldi.

Mamlakatdagi vaksinatsiya haqida gapirar ekan, Angela Merkel jarayon muvaffaqiyatli kechayotganini va “tunnel oxiridagi yorug‘lik”ni ko‘rayotganini ta’kidladi.

Avvalroq fon der Lyayyen vaksinatsiyaning deyarli to‘rt oyi davomida Yevropa Ittifoqi davlatlari koronavirusga qarshi 126 million doza vaksina olganini ma’lum qilgan edi. Hozirgacha ularning 100 million dozasi ishlatildi, 27 million kishi vaksinaning ikkinchi dozasi bilan emlandi — bu Yevropa Ittifoqi aholisining 6 foizini tashkil qiladi.

Bundan tashqari, Yevroittifoq Pfizer bilan Yevropada ishlab chiqarilishi kerak bo‘lgan 1,8 milliard doza vaksina yetkazib berish bo‘yicha shartnoma tuzgani ma’lum bo‘ldi.

Ma’lumot uchun, Germaniya kansleri Angela Merkel Yevroittifoq davlatlari rahbarlari bilan o‘tkazilgan uchrashuvdan keyingi bayonotida Yevropa Ittifoqi mamlakatlari yaqin kelajakda koronavirusga qarshi emlanganlik to‘g‘risida raqamli sertifikatlar yaratishga kelishib olganini ma’lum qildi.