Rossiyadagi Korrupsiyaga qarshi kurash fondi mamlakat prezidenti Vladimir Putinning “eng maxfiy rasmiy dala hovlisi” bo‘yicha surishtiruv e’lon qildi. Gap Novgorod viloyatining Valday ko‘li yonidagi “Dolgiy Boroda” turar joyi haqida ketmoqda, deb yozadi Meduza.
Xabarga ko‘ra, kadastr hujjatlari bo‘yicha turar joy maydoni 250 gektarni tashkil etadi. Ulardan 150 gektari rasmiy ravishda Rossiya Federatsiyasiga tegishli bo‘lib, Federal xavfsizlik xizmati tomonidan doimiy foydalaniladi. Unda qo‘shimcha binolar — omborlar, garajlar, angarlar, shuningdek, kichik mehmonxonalar mavjud.
Fond ma’lumotlariga ko‘ra, qolgan yerlar “Praym” MChJda ro‘yxatdan o‘tgan. Ular Vladimir Putinning do‘sti va “Rossiya” bankining asosiy aksiyadori Yuriy Kovalchukga tegishli.
“Praym” turar joyning ushbu qismini Rossiya Federatsiyasi prezidenti devoniga ijaraga beradi. Firmaning moliyaviy hisobotlariga ko‘ra, so‘nggi o‘n yil ichida “Praym” ijara xizmatidan 2,7 milliard rubl (35,3 million dollar) daromad olgan.
“Praym”dan ijaraga olinadigan hududda 80 ga yaqin bino mavjud. Ular orasida maydoni 3500 kvadrat metr bo‘lgan to‘rt qavatli bosh saroy, Xitoy pavilyoni, rus kulbasi, hammom, sauna, otxona, golf maydonchasi, bolalar maydonchasi, kinoteatrga ega vip-restoran, bouling, bilyard xonasi va mini-kazino, shuningdek hududga qarashli Vladimir cherkovi bor.
Fondning yozishicha, bundan tashqari, asosiy qarorgohdan unchalik uzoq bo‘lmagan ikki baravar kattalikdagi uy bor — bu umumiy maydoni qariyb 7000 kvadrat metr bo‘lgan ikkita yer osti qavatiga ega spa-majmuasi. Ushbu bino qavatlari rejasi solaryum, suzuvchi basseyn, kriyokameralar, massaj vannalari, stomatologiya, kosmetologiya, loy terapiyasi va limfopressing xonalari, 25 metrli basseyn va alohida massaj blokidan iborat.
Boshqa qavatda yotoqxona, 200 metrli zal, 500 metrli mehmonxona, xizmat ko‘rsatish xonasi, ovqatlanish uchun maxsus lift va akvarium uchun 13 kvadrat metrli xona mavjud. Yer osti qavatida yordamchi va tozalik xodimlarining xonalari, shuningdek, tuzli hammom, loy terapiyasi va maxsus aloqa vositalari uchun xonalar mavjud.
Fond ma’lumotlariga ko‘ra, Valdaydagi qarorgoh Putinning eng sevimli uyi. Mazkur turar joy haqida juda kam ma’lumot mavjud — rasmiy fotosuratlar va davlat xaridlari to‘g‘risidagi ma’lumotlar bor, xolos.
“Qachondir Putin hokimiyatni tark etadi, qolgan uylar Sovet Ittifoqi davridagi kabi balansda qoladi, ammo bu yerda davlat turar joysiz yerlarning yarmigagina egalik qiladi. Qolgan hammasi Kovalchukga tegishli. Putin nol tortishish kuchida uxlaydigan va rassomlarni taklif qiladigan mana shu joy uchun yiliga 300 million rubl havoga sovuriladi”, — deyiladi fond bayonotida.
OAV 2018-yilda Yuriy Kovalchuk va uning oilasi tuzilmalari Valday ko‘lidagi dacha atrofidan 460 gektar o‘rmon va dalalarni olgani, shuningdek, yerlarning bir qismini boshqarishni boshlagani haqida yozgan. 2017-yilda “Praym” kompaniyasi davlat dacha hududidan suv quvurini o‘tkazdi va uni o‘z mulki sifatida ro‘yxatdan o‘tkazdi.
Ma’lumot uchun, Korrupsiyaga qarshi kurash nodavlat tashkiloti, bu Aleksey Navalniy tomonidan 2011-yilda tashkil etilgan fond. Uning asosiy faoliyati — Rossiya hukumatining yuqori organlarida surishtiruv o‘tkazish, korrupsiya sxemalarini oshkor qilish va korrupsiyani yo‘q qilishga qaratilgan.
19-yanvar kuni Korrupsiyaga qarshi kurash fondi “Putin uchun qurilgan qasr” haqida katta surishtiruv e’lon qilgan edi.
Aleksey Navalniy iddao qilishicha, Rossiya prezidenti Gelenjik yaqinida, Qora dengiz sohilida “butun boshli qirollik”ka egalik qiladi, uning maydoni “Monakodek 39 ta knyazlik hududiga teng”.
Keyinroq Rossiya prezidenti Vladimir Putin Korrupsiyaga qarshi kurash fondi (KKF) surishtiruvida tilga olingan Gelinjikdagi qasrga na u, na uning qarindoshlari egalik qilishini bildirdi. “U yerda mening mulkim sifatida ko‘rsatilgan narsalarning hech biri na menga, na mening yaqin qarindoshlarimga tegishli emas va hech qachon tegishli bo‘lmagan. Hech qachon”, — degandi Vladimir Putin.
Izoh (0)